朱玲玲月前率先開腔承認兒子霍啟剛今年將與郭晶晶結婚，但日前佢又話後悔爆婚訊，害個仔成為追訪目標，但好友葉蒨文就叫佢唔好自責，不斷開解佢。雖然作為準奶奶，朱玲玲顯得有壓力，但難掩好心情，問佢個仔婚禮進度如何？佢話：「佢自己做好多，都有問我意見。」是否已跟晶晶父母談過婚事？佢話：「香港冇見過，北京見過都傾過，會香港、北京兩邊搞。」
葉蒨文表示未收到請帖，但佢表示：「我睇住啟剛大，細細個已經一齊周圍去，聽佢結婚都嚇一跳。有見過晶晶一兩次，好靚又靜、又斯文，佢兩個生BB一定好可愛，啟剛細個眼仔睩睩。」
