[資訊分享] 松鼠狗榮港人最愛

香港人鍾意養狗，有寵物雜誌今年1月到12月期間舉行網上「香港十大犬種選舉」，有5964人投票，結果體型嬌小、模樣可愛嘅松鼠狗以1418票，成為香港人最鍾意嘅狗仔；一樣細細隻嘅八哥同貴婦狗都唔輸蝕，拎咗第二同第三名。

八哥第二貴婦狗第三

中港澳寵物同業協會代表兼貴婦犬專家暨單獨展評判員（中國）陳美儀話，香港地方細，小型狗最受歡迎，但佢提醒Emily，呢啲狗比較溫純，畀陌生人抱起都唔會反抗，好易畀人偷走，大家千祈要小心。

陳美儀話，法例規定狗仔5個月大就要植入微型晶片同領牌，萬一唔見咗狗仔都易啲搵得番，但好多狗主諗住隻狗多數留喺屋企就唔理，當局又無可能逐隻狗檢查，所以都係靠狗主自律。

養咗貴婦狗5年嘅林小姐就同Emily講，兩年前帶愛犬「多士」行山，差啲走失，好彩林小姐跑得快先搵得番。自此之後佢會睇清楚，肯定狗仔無機會走失先會放繩，又會訓練佢聽指令，家養多隻貴婦狗都未走失過。