10-2401:00
一坐埋櫃枱就會自動波變古肅樣的「啫喱」極威嚴，眼向前望耳聽八方，「試吓買嘢唔俾錢呀，追到你天腳底呀！」曾老闆一路收錢一路聲沙沙做訪問。呢招正宗落閘放狗！小小的一條大埔墟大明里，高手雲集，隱藏喺許多名物。群記清湯腩馳名的牛面珠，發哥譚校長都係粉絲；亞婆豆腐花條龍長到，無諗過食一碗五蚊豆腐花都要輪蛇餅囉。不過一山還有一山高的，肯定是7仔般24小時營業的業成，店東非姓楊，不足百呎的格局，報紙雜誌口笠濕啤酒𡃁仔玩具樣樣有，像回到70年代舊式屋
士多的模樣。但更頂癮的是，年中無休幫老闆曾生坐鎮櫃面看鋪的得力伙計，是一頭狗，是一頭天生非常人臉的混種唐狗「啫喱」，「佢靚仔有型又純品」隔籬林香果舊的老闆娘對「啫喱」評價好似外母見女婿，直豎拇指有讚無彈。隔成條馬路咁遠的街坊街里，也會邊行邊嗌過對面鋪同「啫喱」打招呼。「佢好紅，上過電視，連鬼佬都走嚟影佢。」曾老闆強調了不下十次！我點會唔信你呢，否則，壹仔唔嚟影啦！
牛高馬大的「啫喱」，
都唔使坐，就是這樣半挨半企的將重心趴在枱面上借力，「一企得耐就會叫佢坐低休息吓，長期俾枱角責住心口，你都咪話，好痛㗎！」曾老闆每隻字都錫到「啫喱」
！
這幾張都是「啫喱」的死硬粉絲影完相後，曬回給曾老闆留念的，他呀，老人家簡直當寶咁用膠袋包起，日日對住。
一見到老闆忙喺點算剛落鋪新到雜誌，「啫喱」即刻在咱們面前示範如何補位俾大家睇，真係盡責到連「打喊露」都唔敢擘大個口呀！
即使隔籬賣生煎包的嬸嬸上前撩玩，做嘢還做嘢的「啫喱」依然企硬，總之無老細柯打絕不輕率擅離職守。
乖仔午睡訓醒，曾老闆還會體貼地幫「啫喱」抹面，「上鏡靚仔嘅唔好咩？！」
富你個頭今年三歲半的「啫喱」仔，是自來狗，「佢自己盲舂舂衝入嚟。」曾老闆說。送上門無理由唔要啫，於是收留，從此在鋪頭兩餐一宿。「佢日頭陪我一齊看鋪，一人睇一邊囉，夜晚輪到個仔接我更。」原來「啫喱」先係鐵人28，眠一眠已經當叉電！「『啫喱』好醒，識自己補位，有時見我行出鋪面疊報紙，佢自自然就會企
鋪中間，我唔叫佢唔走㗎！一見我行去左邊收錢咩，哈佢又會自動波去另一邊幫手睇住。」無師自通？神犬拉茜乎？「叫做教過幾次咁啦，都唔使點勞氣，一教就曉。」咁幫得手，真係自來狗富
？「嘻嘻嘻富你個頭，苦就有！」根本曾老闆口是心非，表面語氣懶無嘢，查實句句開口埋口都讚到隻狗似會考嗱9條A ，「有佢喺度，連一張紙皮都唔使旨意嗱走！」在「啫喱」的嚴密監視下，鋪裡頭的東西，永遠只能有入無出，除非曾老闆親手交收。「我有個朋友，係西貢村長嚟嘅，佢有次擺低箱嘢
鋪頭，行開一陣，轉個頭返嚟問都唔問聲我，就自己一支箭標入鋪頭嗱嘢走，就算嘅嘢係佢，一樣俾「啫喱」吠到趕咗出門口呀。」只齋吠而不咬？「佢好有分寸嘅，如果逼到『啫喱』要開口，一定好大劑。」但我未經「啫喱」同意擅自走入鋪頭喎？在店外猛影的攝影師，聽完以上對話之後，陰陰嘴笑住乘機彈開九丈遠！
當「啫喱」仔咁錫，直言親生仔都冇咁聽話的曾老闆非常體貼，成日嗌break ，好讓廿四小時on duty 的「啫喱」，有充分休息。
曾老闆金口一開：「『啫喱』乖
出去玩呀！」即刻成隻生猛晒！被老街坊整蠱，又俾小朋友抽水，「啫喱」繼續一副四萬咁口，同看鋪嗰副認真尊容，絕對兩回事！
