飛機耳
代表：迷惘疑惑
時光倒流到03年：香港警犬隊宣布將為本地警犬換血，引入一種荷蘭進口名為比利時瑪蓮萊犬Belgian Malinois 的品種，逐步全面取代現役的德國狼狗。
記得當年曾接受本欄訪問的高級督察吳國榮，曾用以下形容詞介紹這班未來新貴：「肌肉身形、極具體能爆炸力，靈活性一流，又夠健碩長壽，閒閒哋都超過十二、三歲……」說罷還聯同幾位手足，全副過頭笠保護罩示範《警訊》熟口熟面警犬隊train 狗動作。我眼睇住嗰隻瑪蓮萊由6至8咪遠，起跑，一躍，就好似一支箭，成罐石油氣咁嘅分量，拋物線衝埋去瞄準可疑目標——個膊頭開口就噬，無指令唔放！嗰刻，我同攝影師不約而同的動作，是有咁後企到咁後，心諗：呢種狗癲㗎！
所以當收到二五報料，話有朋友將瑪蓮萊當寵物犬，我忍唔住向聽筒那邊咆哮：「你朋友癲㗎？！」「無嘢呀，都不知幾過癮，馴過隻貓。」視瑪蓮萊「龍龍」如親生女的Ronald 和Winnie ，對這種犬留給我的難忘經歷，一臉的不惑！
Ronald 養狗前，真係有停一停諗一諗咪一咪。了解過狗種特性，明白養狗入門先養，好有責任感！
眼前的瑪蓮萊「龍龍」，眼神稚氣，完全零殺傷力，又戇烚哈，經常成頭問號咁，呆望喺攝影師支會發出聲效和閃光的攝影鏡頭，仲望到頭側側耳耷耷出
lam ，爆！
有相為證
都係瑪蓮萊犬，03年吳國榮高級督察就同好拍檔「Max 」為遷就快門，重複又重複動作給咱們連環快拍。跳到好似上鍊電兔咁款的「Max 」，越跳越彪悍，當玩咁，一跳，已經到頸！
我本烚熟
我明白了，這種雜荷蘭牧羊犬，德國牧羊犬及大丹等best of the best 工作犬基因的狗種，就等於《殺神特工》裡面的JamesMcAvoy ，未開竅前，傻仔一名；一經地獄式特訓，遇神殺神！「我就係因為警犬隊先認識呢種狗，嘩型到呀！仲觸動我三年前開始想養狗，就當俾個藉口逼自己做多嘅outdoor 運動囉！」絕非一時衝動，還的起心肝上網摷資料買書狂啃，越咪越迷，後得知香港新界有繁殖場培育這種狗，千金難得合眼緣，科水，一萬就一萬！
點知，眼見的，和親身接觸的，又是兩碼子的事。取名「龍龍」，皆因姓龔的Ronald ，想起蕭若元幾位千金，一個蕭瑤瑤一個蕭湘湘一個蕭灑灑，好型：「叫『龔龍龍』」喺咪型多十倍先！」鬼整阿女原來係傻嘅：「一日到黑淨係識擔波，
屋企兜圈同黐住我老婆，嗲到我老婆瘟瘟沌沌。」裙腳女孝順咪幾好，你妒忌呀？「無喎，個女黐我老婆，我老婆鍾意黐我，咪一樣！」高見！厲害！
鬥雞
事實所見「工」字型坐姿的「龍龍」果然另類，有波玩，就連我呢個新相識都跟。為表示乖聽媽咪話，對住手上兩粒糖糖望到鬥雞流到一地口水，都唔敢食；一有得食？開心到碌地呀！有得同爹哋玩attack ，直頭興奮到四腳離地，趣！
天生愛漫遊
鍾意跑草地鍾意玩拋飛碟鍾意坐私家砵砵車鍾意遊船河鍾意同伴狗友鍾意游狗仔式的「龍龍」，單憑張張都笑到合不攏嘴，展露特長紅豆雪條的私相簿，就知被爹哋媽咪當寶錫到
！
