蘇格蘭摺耳貓 易患不治之症蘇格蘭摺耳貓圓頭可愛，耳仔更摺了一摺，外形特別，十分受養貓人士歡迎，純種貓更賣至過萬元一隻，仍大把fans。在可愛的外表底下，蘇格蘭摺耳貓原來天生有缺陷，身懷「軟骨骨質化發育異常」症的基因，隨時有機會發病，令貓貓行動不便，更有機會死亡，屬不治之症。Doris與數名網友因此成立了香港摺耳貓病友會，反對繁殖摺耳貓，希望大家正視摺耳貓的問題。
波子 蘇格蘭摺耳貓 女 6歲波子的病情雖然受到控制，但還是不能常常蹦蹦跳跳，大部分時間仍會躺在自己的小窩裏。
患上軟骨骨質化發育異常這種骨骼病，關節的軟骨會開始硬化，及影響脊骨發展，所以波子的腳掌及尾巴明顯較為腫大，而尾巴亦縮短了不少。
Doris在家中共養了3隻摺耳、2隻家貓、1隻英國短毛及1隻布偶，「屋企人有養開貓，受到佢哋影響，自己都好鍾意貓，我所養嘅貓全部都係喺朋友度收養返嚟。」
6年前，Doris便「領養」了波子和BoyBoy回家，「朋友搭朋友介紹話有貓貓需要領養，嗰日上到去佢屋企見到有十幾個人喺度揀緊貓，之後嗰個人話每隻貓要收番$500利是，我要咗波子同BoyBoy，事後諗番嗰個應該係繁殖者。」
本來人貓樂融融，但波子回家不足1個月就得了怪病，「起初接佢返嚟，已經發現冇之前養開嘅貓仔咁活躍，以為係性格問題，點知之後有日返到屋企見到波子攤喺地下唔郁，嘗試抱起佢行吓，佢一步都行唔到又跌番喺地，嗰刻就知大件事，即刻帶佢去睇急症，獸醫話佢可能只係拗柴，叫我帶佢返屋企觀察吓先，咩治療都冇。」
對波子的病情始終放心不下，Doris於是上網查找資料，「拗柴冇理由係咁，返到屋企我就上網搵資料，喺一個台灣blog度見到有人post摺耳貓會有遺傳病，病徵同波子好吻合，於是我即刻帶佢睇第二個獸醫，今次獸醫話波子患嘅係軟骨骨質化發育異常，仲開咗止痛藥，但波子食完藥都係冇起色。」
做針灸治療
自己知自己事的波子，一看到屋內其他貓貓衝來，便會停止玩耍，怕被牠們觸及痛處。
其後Doris在網友Flora的blog中得知，她養的摺耳貓有同一個病，「喺交流之下，Flora介紹咗一位獸醫畀我，佢好清楚講解番波子嘅病情畀我知，但佢建議將波子人道毀滅，我唔肯放棄，希望可以救番佢，於是獸醫採用針灸、落藥加食療，雖然針得好深要用麻醉藥，風險好大，但做咗一次後發覺波子病情有明顯改善，脫離咗危險期。」
軟骨骨質化發育異常在現階段並沒法完全根治，現時波子的病情已受到控制，但日常生活多少都受到影響，「受軟骨增生影響，波子4隻爪都變晒形同腫晒，條尾仲縮短咗，令到佢坐立不定。每個月都要帶佢覆診，每日都要食藥同supplement，針灸都係幾個月一次，不過佢𠵱家都會好似正常貓咁撲嚟撲去。」每次針灸約花$600，不計針灸費用，治療波子的費用約1千以上。
在發生波子事件後，Doris與數位有相同遭遇的網友，成立了香港摺耳貓病友會，「喺網上成立群組，等遇上同樣問題嘅主人知道點樣照顧隻貓，一齊分享經驗，另一方面宣揚反對繁殖摺耳貓，連英國最大嘅兩間貓會GCCF(Governing Council of the Cat Fancy)同FIFe(Federation Internationale Feline)都認為摺耳貓有遺傳缺陷，不接受喺該會註冊。我哋希望有更多人重視呢個問題，令錯誤唔好再繼續落去。」
BoyBoy同樣病發
Doris愛鍚貓貓，為了方便有病的貓貓上落沙化，加上一些小樓梯，方便牠們攀爬。
在波子病情較為穩定後，BoyBoy沒有逃過厄運，在歲半時開始病發，「有日見佢動作有啲唔妥，玩嗰陣唔肯撲，前車可鑑於是又帶佢睇醫生，好彩佢嘅病算係輕微，只係要食藥同supplement，行動冇受太大影響。」
今年3月，有貓義工在長洲發現摺耳貓Yoda遭人拋棄，現暫託於Doris家中，「接Yoda返嚟嗰陣，佢嘅毛又污糟又硬，即刻帶佢清潔同睇獸醫，身體冇事，只係好怕人，會匿埋一角，不過我諗會收養埋佢，始終摺耳貓有潛在風險，自己有經驗會好啲。」
BoyBoy 蘇格蘭摺耳貓 男 6歲
BoyBoy同樣患上軟骨骨質化發育異常病症，但幸好情況不嚴重。
Yoda 蘇格蘭摺耳貓 男 約3歲
最近義工將Yoda暫養於Doris家，「我會收養埋佢，如果佢有病我都識得照顧佢。」
冇
得醫
Doris與幾位相同遭遇的網友，成立香港摺耳貓病友會，宣揚反對繁殖摺耳貓的訊息。
純種貓狗多有病痛，好像金毛尋回犬多有髖關節問題、緬因貓會有先天性心臟病等。蘇格蘭摺耳貓身上就帶有軟骨骨質化發育異常(Osteochondrodysplasia)這種骨骼病變遺傳病，只要帶有摺耳貓基因的貓便有機會出現病變，雖然並不是百分百病發，但一旦病發便是絕症。
Doris解釋︰「軟骨骨質化發育異常簡單嚟講係軟骨硬化同異常增生，一旦病發，關節間嘅軟骨會開始硬化，貓腳趾因增生而變形，令貓一郁就會痛，如果嚴重落去會蔓延至脊骨，甚至令呼吸道收窄，目前為止呢個病仲未有醫治方法，只能用藥物去紓緩病情，可以話係一種帶畀貓貓好多痛苦嘅長期病。」
網址︰
http://forum.hksfsickcats.com
Facebook︰
http://www.facebook.com/hksfsickcats
