壹號頭條:十四歲初中生索K潮
四名年僅十三四歲、就讀於粉嶺官中的中二女生，上週被發現索K 後在課堂狂high ，神志不清送院，令人驚訝的是，毒品乃購自同校一名十七歲的男同學。
這宗校園集體吸毒販毒事件，引起公眾嘩然。記者跟隨外展社工在北區通宵「執仔」，發現濫藥風氣在中學原來非常普遍。有就讀中二的小男生儼如專家，對各類軟性毒品如數家珍；也有青年被誘使做「小拆家」，賣K 仔搵真銀。
最令人憂慮的是，由於臨近回歸十周年，近月內地大力打擊濫藥D 場，促使大批苦無出路的軟性毒品，流入北區校園。學校又因怕家醜外傳不肯正視問題，有前線社工擔心，北區學校最終淪為「毒品樂園」。
上週六，記者跟隨協青社通宵外展隊到粉嶺及上水一帶，找到一班索K 學生，這班青年對粉嶺官中索K 事件議論紛紛。中三便輟學的雙失青年阿俊，更直言認識四名索K 女生。
「我識嗰四個女仔，粉嶺有幾大啫，喺街玩咪識囉，佢哋唔算話high 得好緊要嗰類，可能啲K 太純，所以high 大咗啫！件事爆咗出嚟，有次喺街度見到其中一個，佢話好大鑊，唔知點算。」
他不諱言，不少學生都趁午飯時間「high 嘢」。「係學校high 唔出奇，大家聚埋一齊好無聊，喺學校咪匿埋廁所食咁囉！我身邊好多人都會high ，一班人出嚟玩，或者唔開心，都要嚟料（索K ）。」
中二拆家 一粒賺五十蚊
十四歲的文仔，亦是無毒不歡的北區少年，索毒年資已有兩年的他說：「我話你知，一粒細細粒嘅、啡色嘅上水圍梅花，三十蚊一粒，初哥食半粒已經夠high ；但我認為要食可樂先最正，好貴，五、六百蚊，可以十個八個人一齊歎……上年暑假最抵食，一粒K 仔二十蚊有交易，依家多人要，搶貴晒，質素無咁好嘅，都要四十蚊粒，好啲嘅就要成六十蚊粒……」
在粉嶺一間band 3中學讀中二的文仔，對各類軟性毒品的價格及質素如數家珍，有時兼做轉售軟性毒品的小拆家。記者說想問「行情」，身邊好友立即推他出來，說入貨都要問過他，「五十蚊入，賣到一百蚊之類啦！」至於怎樣嗱到貨？文仔就說自然有人找上門，叫你「試吓新口味」。
不過，自言「隨時嗱到貨」的文仔，就謂不會賺老友錢，只會以成本價益老友。記者問這個識途老馬有無試過「high 大咗」，他直認不諱。「有次女朋友話我唔陪佢，要分手，激起上嚟一次過索咗百幾二百蚊K ，夠四、五個開餐嘅分量，即時上晒腦，幾個鐘喺樓梯完全郁唔到，嚇到佢死！」索得又狠又多，記者見他說話語速特別慢，問他是否後遺症？他就堅持自己「不嬲係咁」，冇問題。
但專家早明言K 仔會傷害吸食者的神經，會食「壞腦」。讀到中三便輟學的阿占便說，身邊好多朋友索到失憶爛鼻，「有啲索到無晒感覺，原本將啲K 粉放在手背索少少已經好high ，我識得有個放到一條手臂咁長都話無feel ；有個咩都唔記得，成日問你係咩水？」阿占在記者面前比畫堆起的小K 山分量，說見到都怕怕。
協青社外展社工賴緯倫直言，「知道K 仔傷身仍然要食」，是大部分濫藥年青人的共通點。記者跟隨外展車隊期間，雖然已是凌晨近二時，但仍有一名心急媽媽致電阿倫求助，說在兒子的衣袋內找到丸仔，「佢個仔話大佬俾啲K 仔佢，要佢賣俾其他人，個仔仲叫佢阿媽一係俾番啲丸佢、一係俾五百蚊佢去同大佬交數。」
內地嚴打 北區散貨
賴緯倫說近數月來，軟性毒品流入學校及鄰近屋村的情況比前嚴重，擔心愈來愈多不法之徒在校園及屋村吸納小拆家，「有年青人同我講，做拆家可月賺七、八萬，對零用不多嘅北區年青人來說，誘因好大。」
北區區議員劉德昌更透露，早於三個月前，同區另一中學也曾發生同類事件，一名中二女生在校內突然昏迷，校方報警把她送院，經檢驗懷疑曾經吸索K 毒，事後一名男生自首，承認曾向同學賣K 仔，只是校方沒有大事宣揚，外界無從得知。
原來，適逢回歸十周年慶典將至，內地濫藥D 場被頻密掃蕩，最接近邊境的粉嶺、上水及屯門一帶的學校，俱成毒販散貨的寶地。
據接近內地公安部門的知情人士表示，七月一日中央領導人即將南下，內地警方已陸續展開部署，銳意整頓港青北上濫藥歪風。自二、三月開始，深圳多次舉行掃毒行動，上月在多個娛樂場所共拘捕逾百人，當中不乏北上濫藥的港青。屯門區議員陳雲生便透露，上月接到一名街坊求助，要求協助營救兒子。「個家長打電話來時好徬徨，話聯絡唔到個仔，只知佢同班朋友去咗深圳玩，我幫佢打電話去羅湖公安局，先知佢個仔因為被驗出尿液有毒品，要行政拘留十五天，三年唔准再返去。」
賴緯倫補充說：「正如上年暑假，旺角發生一宗十三歲少女吸毒暴斃事件，警方後來撼咗當區嘅D 場，啲青年唯有北上（濫藥），近月上面加強掃蕩，啲索K 青年便留在屋村食，北區最近邊境，嗱貨最方便，係重災區。」
免費試食 攻入校園
內地大力打擊濫藥D 場，導致毒品流入學校及地區。毒販採層層分銷的途徑，吸引年青小拆家參與，「貨由內地嚟，但幫手分銷的年青人根本無從得知毒品的來源，中間可能隔咗好多重，但對於不法之徒來說，這卻是滲透入學校的最佳方法，因為買家同賣家都可以係學生。」知情人士說。
看準學校保守的弱點，毒販從不同途徑滲入校園。平價、免費試食是搶攻濫藥用家的慣技，「試過有大佬喺學校話有免費試食，但通常都係益啲新手，我哋就要錢買，好鬼無癮。」一名有三年K 癮的青年說。
毒販無孔不入，學校內販毒和吸毒趨「地面化」，北區一間學校的教師承認，學生濫藥情況存在已久，但校方為免家醜外傳，往往採縱容政策，致情況惡化，「政府要教改，老師本身的壓力都已經好大，爆埋啲咁嘅嘢（索K ）出嚟，無人來讀，搞到殺校有咩咁出奇？況且北區的九反學校好多黑底學生，佢哋打交濫藥，一般老師點識處理啫？」
這名老師說，有時幾個學生目光呆滯東歪西倒，就算估到可能是「high 咗嘢」，都寧願當睇唔到，「你唔肯定，咪當無囉，唔出事，無暈無嘔，好多時學校都寧願當無事發生過，因為一報警，實揚出去。」
知情人士更說，今次粉嶺官中女生上堂索K 事件被揭發，原來都是因為陰錯陽差，「外面話個女學生自己認索咗K ，學校先報警處理，假嘅！係嗰四個女仔午飯時，自己high 完嘢，返到學校突然嘔吐大作，佢哋同學校講話食錯嘢，校方以為佢哋集體食物中毒，報咗警，去到醫院驗尿先知係high 咗。」一名在粉官任職的老師更嘆謂：「都知啲衰仔衰，但唔知咁大膽。」
該校校長余瑞堯週一向記者承認，早於數月前，已收到當區外展社工的通知，指區內青年濫藥問題有惡化跡象，學校已先後為校內師生舉行四場預防濫藥的講座，又撥額外資源，聘請多一名駐校社工，惜最終仍爆出今次事件。余本身為北區校長會成員，該會過去並未有在議程上討論學生濫藥問題，顯示大部分學校在處理學生濫藥問題上警覺性不足。
青年濫藥問題敲響警鐘，根據禁毒常務委員會的最新數字，本港氯胺酮（K 仔）濫藥者，今年首季較去年同期大升三成七。濫藥者中，六成五是廿一歲以下青少年，較去年同期上升逾一成。香港遊樂場協會與浸大的調查也發現，濫藥者有年輕化趨勢，最細只有九歲。
低估情況 警區被動
不過，保安局局長李少光早前在立法會上回應議員質詢時，竟謂去年只有廿四人在校內吸毒，情況未算嚴重。香港基督教青年服務處藥物濫用者中心（PS33）主任陳健儀指，很多學校教師分辨學生是否濫藥的能力有限，往往以為濫藥學生只是睡眠不足或身體不適，沒將他們歸類為濫藥者，港府掌握的數據明顯低估實際情況。
事實上，警方在北區雖設專門針對學校工作的警民關係組，但與學校的聯繫明顯不足，十分被動。北區區議員劉德昌表示，試過有校長向關係組反映在校外被童黨騷擾，關係組竟叫校長自行報警；此外，負責打擊區內毒品問題、有份列席滅罪委員會的上水指揮官，過去一年間換了三次人，如走馬燈，令前線人員難以開展工作。
為亡羊補牢，政府有意在年底推出創新戒毒計劃，由私家醫生為濫藥青年驗身，以確定長期服用軟性毒品對身體的禍害，以收阻嚇作用。不過，陳健儀就認為作用不大，「無記性、智商大降，甚至胃功能大衰退，以前可以這些禍害勸諭年青人主動去戒，現在已經無用。今時今日的年青人會反問：無記性咁又點啫？佢哋看不到未來，只是覺唔開心，要即時開心，所以就去high ，在輔導上更困難重重。」
她直言社會及政府要正視問題，重回基本步，為年青人提供生命教育。也許學懂怎樣快樂生活，才是徹底改善濫藥情況的根本。
睇實仔女
索K5大徵狀
1.說話字眼開始出現一些精神藥物的俗稱。
2.經常要求零用錢。
3.生活顛倒，時常說要在朋友家中留宿；或通宵北上消遣。
4.行為轉變，如經常睡覺、食慾不振或食量驚人。
5.集中力及記憶力轉差。
四名年僅十三四歲的中二女生，上週被發現索K 後在課堂狂high ，繼而不適送院，但事件反映的僅是冰山一角。（《蘋果日報》圖片）
有點像混血兒的阿俊（中），直言曾被誘夾二百元做「小拆家」。
由可卡因提煉的軟性毒品可樂，雖然價錢貴，但對文仔來說，卻是可助升仙的珍品。
毒販透過不同途徑滲入北區校園，免費試食、讓青年學生藉層層轉售分一杯羹，都是慣技。
