家燕姐出家燕遮，認真夠噱頭，家燕姐一向有源源不絕嘅生意諗頭，今次佢嘅精心傑作家燕遮只係佢自家品牌嘅第一炮，準備喺母親節推出寓意遮風擋雨家燕遮。
投資過百萬
家燕遮嘅最大特色就係有佢個Q嘜標誌，呢啲公仔仲係佢大女珊珊嘅手筆。
噚日家燕姐喺香港公園接受訪問，硬銷家燕姐係母親節必買禮物，佢話：「我一直都想有一個自家品牌，今次我仲特登搵咗間廠幫我生產有我個Q嘜嘅家燕遮，之後仲有好多計劃，想出好多嘢，好似文具、日用品、公仔，仲有人想幫我開專門店㖭。」
家燕姐今次投資過百萬搞呢個自家品牌，佢話：「我自己好有興趣做，所以好畀心機，之前上咗去廣州做宣傳，已經有好多人知道有呢把遮推出，仲有好多百貨公司可以賣，今次宣傳費我都放咗成百萬落去。」
大女親設計
今次家燕遮上面印咗佢個Q嘜公仔係重新設計，幕後功臣就係家燕姐大女珊珊，家燕姐話：「呢個新嘅Q版公仔係珊珊設計，有肖像權o架！之前家燕媽媽嗰個，珊珊嫌唔夠新潮，今次呢個好潮o架！有好多唔同造型，有好多唔同衫換，仲有少少性感，最緊要係個公仔額頭有粒癦。」大女珊珊全力支持媽媽，家燕姐開創自家品牌，珊珊話：「家好多嘢我都會幫手跟，唔想佢太辛苦，望想佢顧住身體，我後生都仲可以捱，好彩妹妹今年畢業會返嚟幫手，我自己都想學到多啲嘢，盡快事業有成。」
