擾攘超過一個月的霜峯慾照，昨日又爆第四波，林峯和緋聞女友陳嘉桓的自拍親熱照曝光，更嚇人的是有指疑似林峯情慾片流出。色字頭上一把刀，被慾照慾片打殘的林峯瀕臨崩潰，殘爆的他昨日含淚勸喻舊愛潘霜霜專注工作，言下之意希望她盡快收手；至於潘霜霜也不好過，聲言每次聽林峯歌曲便失控狂喊。你喊我又喊，想不到霜峯戀竟變成一公升眼淚。
連環被慾照打殘的林峯，昨傍晚6時許由經理人及唱片公司人員陪同現身將軍澳電視廣播城，無綫高層樂易玲、監製劉家豪和曾志偉均在場等候。滿臉鬚根、一臉殘爆又眼腫的林峯抵達後即被記者大包圍。
對於有消息指林峯流出慾片，他說：「冇睇，但我聽身邊朋友講過。」林峯語畢已眼紅紅，連續一個月處於捱打狀態的他似無計可施，只希望潘霜霜停手，他一口氣地說：「件事進展到咁，我都有嘢想講。我哋兩個人拍拖嗰段期間，如果真係有任何事同形式傷害佢（潘霜霜），家作為佈局，我甘心接受，但佢家仲後生，希望佢……大家振作番，最緊要係將來好。呢件事令雙方身邊人都擔心，自己都好對唔住身邊人。」
林峯續說：「呢件事（霜峯慾照）喺開始嘅時候，冇一個人心情係好過，而我自己嘅心情絕對唔會比佢好過。」問他曾否想過相片如何流出？他說：「我唔去考究，最緊要兩個人係真心，冇必要、唔好去到咁嘅地步，我真係無比嘅心痛。」此時他已熱淚盈眶。
爆發霜峯慾照後，林峯有否聯絡潘霜霜？他說，「之前有一刻掙扎過，想打電話畀佢。」結果有否致電？他卻無語；是否公司不准？他只說：「我諗唔係適當時候。」至於是否有情慾片流出？林峯不置可否：「我真係唔知，我希望佢可以專心工作，無論我心情係點，都要做好手頭上工作，呢個係做藝人同自己嘅本份，我點都要返嚟開工。」再追問他會否擔心慾片曝光？他說：「家我只能夠回應咁多。」他又忍不住以手拭淚，並往化妝間整裝入廠續拍新劇《回到三國》。
其實林峯昨午原定返電視城出席《回》劇拜神儀式，但臨時甩底，該劇監製劉家豪解釋林峯往錄音延遲才缺席，他說：「佢遲咗嚟唔到，今晚會返嚟開廠。」劉家豪撐林峯沒為事件困擾，他說：「佢好專業，好犀利，日前仲拍咗三顧草廬一幕，佢半點影響進度都冇。」
林峯疑手機和電腦洩密，若被人盜取手機資料並公開是否違法？黃國桐律師昨接受本報查詢時，表示手機中的照片版權屬拍攝者所有，若其他人未經拍攝者同意而取得照片並公開，屬於侵權行為。但若兩人屬於親密情侶關係，那又可算犯法？他說：「就算係阿爸阿媽都係咁話，一樣係侵權。」
此外，馬國明和楊怡昨日出席《回》劇拜神時，異口同聲撐林峯，馬國明說：「家我同人影相都驚驚哋，我普通話唔好，我唔搵內地女友。」楊怡也出言護林峯說：「唔好再迫害佢，私人感情事，唔應公開俾人批判，靚仔身邊梗係多女仔。」
from:
http://hk.apple.nextmedia ... art_id=15164974
