黃婉曼上月13日主持now 101台直播節目《撳錢》時爆粗，當時佢衝口而出講咗「X你」，事後猛賴自己有懶音，話要讀報糾正，不過未夠兩個月，黃婉曼又爆多次粗，佢上星期六接受商台DJ阮小儀主持嘅直播節目《AiShiTeRu》訪問又爆粗，講「X你唔讀書」，今次咬字仲清楚過上次，睇嚟「X你」應該係黃婉曼嘅口頭禪。
訪問中，黃婉曼話讀中學時無端端做咗唔受歡迎人物，仲越講越激動，之後一輪嘴咁話：「有試過風頭躉嘅唔鍾意，大家覺得吖X你，唔讀書又考第一？因為我好隨意，上堂會瞓覺，大家覺得嘩咁又考第一。」之後黃婉曼可能意識到講錯嘢，即刻口窒窒。
就再爆粗一事，黃婉曼噚晚喺電話中死撐：「我應該唔係講嗰個字，如果真係爆粗，阮小儀會當場指出嚟。」三分鐘後佢再回電話：「我同陸永聽番個節目，我應係講『點解你』。」陸永接過電話力撐：「我發覺佢唔係黐脷筋，係忌發『點』字音，佢講親都出現怪音。」馮仁昭好懷疑唔單止黃婉曼習慣講粗口，就連陸永嘅耳仔都有問題，陸永尷尬咁話：「你咁講，我要開始懷疑自己有聽障。」
問黃婉曼同男友拍拖講情話時會唔會夾雜粗口？佢話：「唔會，但我唔係扮優雅嘅女仔，我覺得女仔講粗口要視乎情況，有時可能好激氣，但最好唔好講。」佢接唔接受男友爆粗？黃婉曼話：「睇吓乜情況，我唔會要求人神聖完美。」
from:
http://hk.apple.nextmedia ... art_id=15123871
