金牌大風前主席鄭東漢日前發表聲明宣佈退出公司，引發多種揣測，有傳黃柏高（Paco）將重掌大權，但昨日Paco在記者會上宣佈請辭，向飲食業大展拳腳。鄭東漢就強調兒子鄭中基絕不是行政人才，從來沒有打算要他接管事務。
金牌大風前主席鄭東漢（Norman）與現任主席龐維仁，昨日一起在尖沙嘴舉行記者會，高層陳輝虹擔任司儀，龐維仁表示：「近日好多報道同事實不符，好似話我同Norman嗌交，話佢簽EMI蝕錢，再賣公司畀我，都唔係事實，我同佢呢年半相處，大家關係變得親密，係好好朋友，將來仍然會有好多事一齊做，佢計劃退休，想做自己事，係開心事，我係生意人，唔會做蝕本嘢，如果公司要上市，絕對係可以，話公司閂水喉減人工，冇咁嘅事，加人工先真。」他表示稍後再有記者會，公佈未來公司管理階層的安排。
鄭東漢則表示當年投資EMI時首年未有盈利，但重組後開始賺錢，現已達標，他重申：「我做咗四十幾年音樂，覺得係時候要陪吓屋企人，做番一啲自己想做嘅事。」他強調自己健康沒有問題。提到曾傳兒子鄭中基會接棒，鄭東漢強調說：「冇諗過鄭中基要接我嘅嘢，我好了解我個仔，佢唔係行政人才，從來冇乜嘢太子黨。」
鄭東漢的引退，一度有傳黃柏高（Paco）重掌唱片部，但事實竟令人大感意外，Paco宣佈已向龐維仁請辭，他略帶激動說：「我知道鄭生有意引退，我都開始考慮自己路向，我發現對飲食業好有興趣，會喺呢方面同電影發展，仲有幫李丞責發展佢嘅事業。」他表示與金牌大風有很多合作。對於鄭東漢與Paco離職，鄭中基表示尊重他們的決定並祝福他們。
曾與Paco並肩作戰的楊千嬅和許志安都有留意金牌大風的變動，千嬅前晚說：「佢係我恩師，我都好關心佢，會打電話畀佢。」安仔指Paco是他的好朋友及酒腳，他說：「佢應該冇事，一間健全嘅公司冇咗邊個都得，有個識做嘢嘅就更得，希望金牌再次風起雲湧。」
from:
http://hk.apple.nextmedia.com/te ...462&art_id=14828466
