楊千嬅與丁子高前晚在灣仔君悅酒店補擺囍酒，大笑姑婆嫁得如意郎君，整晚high爆，在敬酒後，開始由嘉賓上台表演，側田與吳雨霏等歌星唱完歌，丁氏夫婦也上台湊熱鬧，而且成咪霸。一對新人各自感謝親友，千嬅致謝辭更自嘲似站在頒獎台，而這晚就是獲得終身成就獎。
楊千嬅與丁子高去年8月在美國拉斯維加斯註冊結婚後，前晚在港補擺囍酒，筵開48席宴請親朋好友，在開席前一對新人穿了婚紗和黑色禮服牽手進場，場內電視播放兩人從小到大、相識、拍拖及拉斯維加斯註冊結婚片段，之後新郎和新娘子上台交換結婚戒指和切蛋糕，並接受現場賓客祝福。
千嬅與丁子高不斷在台上多謝今次幫手搞婚禮的好朋友時，她突然大笑道：「點解咁似叱咤頒獎禮…哈哈，好似講緊得獎感受咁，哈哈，今晚我得到呢個終身成就獎，比任何一個獎更加令我開心感動及快樂，多謝老爺奶奶，送咗個咁好老公畀我，令我搵番自己。爹哋、媽咪，我結婚你哋唔係冇咗個女，係多咗個仔。希望細佬都快啲結婚。」
丁子高則表示以前一生最愛婆婆、媽咪和姐姐，現在多了兩個，他說：「家開始，我生命中多咗兩個最愛嘅女人，一個係我老婆，一個係千嬅媽咪，媽咪我會好好咁照顧千嬅，亦都一定會全心全意照顧你同爹哋（外父外母）。」
後來到林夕、吳彥祖和余文樂等上台說祝福語，林夕表示：「曾經我好肉麻比喻，千嬅好似我心頭一塊肉咁。佢結婚啦，我身上塊肉割咗畀人，家又痛又愛，加起嚟就係痛愛。」
婚宴上丁子高預備了驚喜給老婆，拍了一條片，講自己在產房等老婆生仔，然後穿肉色緊身衫，在錄音室裏面扮初生嬰兒着肉色緊身衫同一班兄弟載歌載舞，令台下千嬅捧腹大笑，賓客拍爛手掌。
丁子高之後上台說：「條片裏面嘅我雖然好儍好搞笑，做呢啲嘢都係得一個原因，因為我好鍾意見到老婆笑。可以有機會見到我最鍾意嘅女人笑，係我終身幸福。千嬅，你係冇嫁錯老公嘅！」
想不到前晚的婚宴會造就了另一對婚姻，丁子高姐姐的男友趁婚宴的感人氣氛下求婚，在場人士都起哄叫丁姐姐「嫁佢！」結果她答應男友求婚，全場齊鼓掌。司儀森美就請側田等歌星上台唱歌助興，接着丁子高和千嬅也上台合唱，直至唱到凌晨1時許才盡興回酒店房間休息。
from:
http://hk.apple.nextmedia ... art_id=14790922
