36歲楊千嬅與31歲的丁子高去年8月在美國拉斯維加斯註冊結婚後，昨晚假灣仔君悅酒店補擺喜酒，豪花200多萬打造溫馨悅目的婚禮。在婚宴前一對新人接受記者訪問，大情大性的千嬅一時喪笑、一笑喪喊，十分有趣。千嬅表示雙方家長都希望他們開枝散葉，所以婚後最大任務就是製造愛情結晶。
楊千嬅與丁子高花了半年時間籌備在港補擺喜酒，而且丁家也落足本錢迎娶千嬅。前晚在君悅酒店筵開48席，以每席約28,000元，估計昨晚單是酒席已花費約134萬元，而意大利Carlo Pignatelli婚紗則價值128,000元，結婚戒指是伯爵的18K白金鑲嵌16顆圓形美鑽，約值76萬，而佩戴的鑽石項鏈和手鏈價值超過1,000萬，全部由伯爵珠寶贊助。
昨午約4時30分一對新人在酒店舉行切蛋糕和祝酒後，他們接受記者訪問，由於千嬅的婚紗太長，丁子高經常踏到她的裙尾，拍照時又不小心踩到她腳趾，終令千嬅發說：「你踩到我條裙好多次啦！」搞到其夫一臉尷尬。丁子高又不時提醒記者不要這樣不要那樣，令千嬅忍不住取笑他說：「你今日做新郎，咪鬼好似平日返緊工咁啦！」
記者要求新人互吻，丁子高和千嬅即以不同角度咀足3分鐘。後來新郎想抱起新娘來合照，怎知千嬅突然對老公說：「你做個chok樣畀我睇先抱我啦！」搞到全場爆笑。兩人在場打情罵俏，千嬅說：「噚晚成晚都好緊張，但因為好攰，所以3點就瞓咗啦！反而上年喺美國註冊完就成晚興奮到瞓唔着，不過今朝一早俾老公叫醒後，提我要做呢樣又要做嗰樣，感覺上我今日好似做緊IPS（公關公司）活動，完全唔似結婚咁。」
擺酒大日子千嬅收到奶奶丁媽媽送的6隻金豬，她笑說：「斟茶時佢哋係咁叫我食蓮子，希望我可以連生貴子，其實結婚都係想組織家庭，想有小朋友，所以我會生小朋友，不過我諗等出年年頭做埋巡迴演唱會，先至可以不設防全速生仔。」
昨晚整個婚禮都是由丁子高負責統籌，千嬅很感謝老公：「好多謝老公今日搞到個婚禮咁成功，畀到咁多神秘感同意外驚喜我。」說完千嬅眼泛淚光，老公立刻用紙巾替她抹眼淚。問到兩人有甚麼愛的宣言？丁子高表示：「我成個人都送咗畀佢。」他話未說完，千嬅已搶着說：「你點解唔講愛的宣言係以後唔好再喺床放屁呀！冬天啲被咁厚，好難散走啲味o架！」說完兩個人儍呼呼大笑起來。
到千嬅說愛的宣言時，她表示：「未認識佢之前，我唔相信自己會結婚，係佢令我由冇期望變成有期望，明白到婚姻不重於物質同地位，係我搵番自己嘅真身出嚟！」說罷千嬅喜極而泣，丁子高也忍不住眼濕濕說：「我冇娶錯你。」
昨晚丁楊婚宴由森美擔任主持，他笑言不會做人情還應該收利是，問森美會否玩新人？他坦言：「志偉都喺度，怕玩到天花龍鳳停唔到！但係我知丁生會有驚喜畀千嬅，但連我都唔知係乜嘢。」
from:
http://hk.apple.nextmedia ... art_id=14787260
