無綫劇集《巾幗梟雄之義海豪情》自播出後，飾演細膽排骨仔的敖嘉年連日慘被欺凌，每晚哭哭啼啼好不凄凉，其出色演繹淚滲觀眾心，隨即掀起網上排骨熱之餘，更令他人氣暴升，火速成為年底台慶頒獎禮的最佳男配角大熱，惡鬥至強勁敵林嘉華。
無綫台慶劇《巾幗梟雄之義海豪情》本周隆重登場，排骨仔敖嘉年率先彈出，人氣爆錶。其角色膽小怕事冇大志，終日被人打罵，當中以第三集（20日）劇情最緊湊，講述排骨仔被誤會槍殺岳華之子，遭岳華用槍指嚇生死一線間，排骨仔眼見黎耀祥飾演的醒哥為保他吃盡苦頭，自以為必死的排骨仔喊到眼淚鼻涕一齊流。敖嘉年的感人演繹七情上面，大受網民激賞，連他也在微博留言：「發現很多人愛排骨的鼻水。」
去年敖嘉年憑《巾幗梟雄》的奸仔必文一角，勇奪台慶頒獎禮飛躍進步男藝員獎，今次他再接再厲喊入屋，網民第一時間推波助瀾，紛紛留言要推他攞最佳男配角獎，跟最強對手《鐵馬尋橋》大奸角林嘉華拗手瓜，敖嘉年昨日接受本報專訪時則說：「我冇諗過，難得觀眾鍾意呢個角色，好過攞獎啦，我想劇集攞獎多過個人獎，今次套劇嘅班底係可一不可再。」
34歲的敖嘉年入行14年，由DJ到藝員，又由大茄做到第二男角，到近年他上位才吐烏氣，他說：「初入行時自己際遇唔好，冇運，試過有前輩睇到我嘅演出後，話我不如唔好做啦，做得唔好戲又屎，外形又唔得，我聽完個心唔舒服，但基於佢係前輩我又新，返屋企冲凉時喊咗出嚟。」
敖嘉年續說：「我有諗過唔做，但唔拍戲又可以做乜，我想打好呢份工，等機會囉。」他拒絕透露該前輩的身份，但據悉此人正是馬浚偉。
等運到的敖嘉年結果bingo，多得監製李添勝連開兩輯《巾幗》谷他上位，敖嘉年說：「《義海》第三集我睇咗好多次都忍唔住喊，好多朋友睇完打畀我話喊，有啲仲話想跳入電視機幫我抹眼淚。呢次係我有史以來喊得最多嘅一次，全部都係真眼淚，因為有好多係一take過，唔可以停機滴眼藥水，但劇本好，會不其然墮入角色。」
黃日華和杜汶澤近日均在微博大讚敖嘉年好戲，有人更在敖嘉年微博留言，指杜琪峰也稱讚他，敖嘉年說：「話杜sir讚都唔知係唔係，但真係好意外好開心。」他又笑說：「今次係有好多人讚，比上次嘅必文更多迴響，噚日我喺公司走，門口嘅保安讚我好嘢，我問佢點解，佢話播第三集時佢喺公司餐廳食飯，好多人一路食飯一路喊，仲話幾想影番張相畀我，等我睇到係幾咁震撼。」
敖嘉年排骨發威，工作多籮籮，前晚無綫便安排他在將軍澳電視廣播城主持《全城愛牙由齒起》節目。提到《義》劇首集平均收視有32點（約204萬觀眾），敖嘉年說：「收視我哋控制唔到，不過tvb.com點擊破晒紀碌，呢幾日都多咗好多工作搵我。」又謂能做主持很開心，他說：「我以前已經好想做司儀，家無形中達成咗，嚟緊想唱主題曲，其他嘢就唔諗喇。今日有個前輩都讚我，仲叫我唔好囂，我何德何能囂吖？」
敖嘉年在《義》劇頭三集戲份極重，有指是無綫力捧他，他卻反問：「係咩？邊度聽返嚟o架？公司係好錫我，不過力捧嘅嘢好抽象。」問到成為最佳男配角大熱的他有否信心攞獎？他說：「希望啦，都要睇入唔入到圍，隨緣啦。」
from:
http://hk.apple.nextmedia ... art_id=14582815
