雷凱欣拍攝嘅3D情慾電影《3D肉蒲團之極樂寶鑑》接近尾聲，當佢決定豁出去全裸上陣後，不但唔後悔搏命谷胸減肥，務求最佳狀態獻身幕前。呢一脫雖然未知可唔可以成名，但起碼令雷凱欣人氣飆升，商場騷同廣告接到手軟，上星期又火速接咗部新戲《宅男總動員》，佢今日就要出發上海拍攝，噚日就留屋企執行裝。
雷凱欣喺新戲《宅》片會同鍾鎮濤（阿B）、黃奕、譚耀文等有對手戲，內容環繞家社會裏有好多宅男同剩女嘅故事，剩女為咗吸引宅男上釣，佢哋諗計誘宅男離開電腦出街拍拖。雷凱欣會出動36F咪咪扮演宅男女神，佢噚日喺電話度話：「係呀，呢個角色真係好似做番現實生活嘅自己。」
大把人追嘅雷凱欣絕對唔係剩女，佢反而話自己係宅女，佢話：「我無時無刻都要上網，冇咗個電話會死，可以匿埋屋企成個星期唔出街都得，但一定要有部電腦同電話陪我，所以朋友成日取笑要我去荒島生活，真係冇問題，有得上網玩就得。」
對於首次同阿B合作，雷凱欣話好緊張，佢話：「咁佢始終係一個前輩。」戲中可會色誘阿B，雷凱欣話：「未知劇情，不過我拍完《3D肉蒲團》，呢部戲應該冇咁複雜，簡單好多。」當然啦，《3D肉蒲團》床戰連場都應付到，《宅》片變相當然冇咁高難度啦。
from:
http://hk.apple.nextmedia ... art_id=14567596
