恭碩良（Jun）前晚在九龍灣舉行音樂會，獲張學友和林憶蓮兩位份量十足的巨星撐場做表演嘉賓，兩位嘉賓先後出場都掀起高潮。雖然被巨星搶盡風頭，但難得開騷的Jun依然high爆全場，為感激學友畀面更當場跪拜他，不過學友踢爆早於07年已答允做Jun的嘉賓，但Jun之後多次開騷都沒邀請他，似乎怪Jun「請得太遲」。
恭碩良前晚在九龍灣國際展貿中心舉行「恭碩良Jun on the moon Live 2010」音樂會，在圈中人緣甚廣的他，吸引不少圈中人捧場，包括林海峰、彭羚、吳彥祖、Mr.的Tom和緋聞女友蔡穎恩等。除捧場客星光熠熠外，嘉賓陣容更見強勁，邀得張學友和林憶蓮現身表演，認真有面子。
前晚學友和憶蓮出場時都大受觀眾歡迎，雖然被兩位份量十足的嘉賓搶鏡，但Jun依然high爆全場，在台上大顯身手，打鼓又彈結他，並唱出以罵人字眼作歌名的《Damn》，又與學友在台上大玩諧音俗語，學友說出holy時，他即緊接說shit。
Jun自言獲學友答應做嘉賓是其榮幸，更當場跪拜學友以示感激，學友卻踢爆說：「07年佢幫我演唱會打鼓，當時已問我佢開騷時做嘉賓，我嗰時已應承咗，但之後佢幾次開騷都冇搵我。」Jun解釋說：「細騷先唔叫你，不過企喺你隔籬好大壓力，反而喺你後面打鼓就冇咁大壓力。」
至於安哥後才出場的憶蓮，以一身rock味甚濃的黑色打扮示人，與24味合唱《Paradise City》，Jun則沒與憶蓮同台演出。事後Jun在慶功活動上說：「唔同憶蓮合唱係禮貌，請嘉賓都要佢舒服，我一路都係打鼓。」他透露近日簽了吳彥祖的公司，並感激好友在音樂上幫了他不少。對於被指唱粗俗歌曲，他說：「唔好着重字眼，係助語詞，首歌係表達一啲嘢，而holy shit應該係holy sheet，係澳洲一個大牌子，冇乜嘢。」
from:
http://hk.apple.nextmedia ... art_id=14491989
