馬德鐘雖已婚兼育有一子，但依然緋聞不絕，曾有傳老婆帶兒子離港冷戰，幸好最終大團圓結局。但近日有內地傳媒拍到馬德鐘在內地和一高䠷女子在VIP房內撐枱腳，之後兩人更前後腳返回酒店似有下文。馬德鐘昨日現身時否認緋聞，向老婆大派定心丸。
多年前馬德鐘可謂緋聞不絕，先後和郭羨妮和佘詩曼傳因合作撻着，結果有傳他的模特兒老婆心灰意冷下帶同囝囝離開香港，令兩公婆關係處於冷靜期，馬德鐘形象也大受影響，幸好落力箍煲後老婆終回心轉意，近年不時被拍到一家三口樂也融融。
但昨日有內地報道，指馬德鐘在內地被目睹和一身材高䠷的索女約會，相中見馬德鐘穿上T恤和牛仔褲單拖出現，指他接着走入商場內的一間高級餐廳的VIP房，原來他一早佳人有約，房中有位索女在場等候。報道指兩人甫見面即來個熱情擁抱，之後有傾有講，相當投契，直至晚上11時許，索女先離開餐廳，面上依然露出甜美笑容，一邊行一邊似用手提電話發短訊。
約數分鐘後馬德鐘才步出餐廳，之後便開始傾電話，並急步追上索女再超過她行先，奇怪的是兩人扮作全不認識，未有交談，接着馬德鐘走入附近一間溫泉酒店，而相隔幾個身位的索女也隨後而至，似乎約會還有下文。
馬德鐘昨日在觀塘出席活動，被問到和索女約會，他否認說：「我根本唔識嗰個女仔，當日我係約咗劇組嘅人食飯，我根本唔係同佢一齊行，大家完全係陌路人。我真係唔想回應咁多，因為呢啲新聞真係好無聊。」問到老婆有否大興問罪之師？馬德鐘表示沒有，夫婦倆完全沒有看這段新聞。
from:
http://hk.apple.nextmedia ... art_id=14434975
