古天樂同楊千嬅呢對老拍檔，噚日以聯合國兒童基金香港委員會大使身份，出席喺九龍灣舉行嘅記者會，呼籲啲人參加即將舉行嘅慈善跑活動。
一向有哮喘病嘅千嬅都話會身體力行支持籌款，佢話：「家操緊身體準備跑10公里賽，如果將來有咗仔女可能只係跑得3公里賽咋。」佢話除咗準備長跑，仲為演唱會進行減肥，佢補充話：「減咗4公斤，仲差兩公斤，目標係減到得番50公斤。咁跳起舞上嚟都好睇啲。」
千嬅笑言老公丁子高都做緊同一樣嘢，都想減磅令身形好睇啲，但千嬅就話老公有恒心同減得好過自己好多，千嬅話：「佢仲成日引誘我，叫我唔好唔食嘢，仲畀雞髀我食。佢咁積極減肥都係因為畀你哋影得多，所以下定決心想瘦啲囉。」佢透露老公到時都會參加長跑，但就會分開籌錢。
另外，明顯精神麻麻嘅古仔話係因為趕戲關係，佢話：「噚晚趕緊拍套《單身男女》，唔係因為睇波，同高圓圓場親熱戲拍咗啦！都係點到即止啫。」古仔話如果到時唔使趕戲，都會考慮嘗試吓參加長跑。
from:
http://hk.apple.nextmedia ... art_id=14220884
