TVB歌唱節目《超級巨聲2》開鑼後，邀得杜麗莎加盟擔任評判之一，沒想到因而為節目帶來陣陣火藥味。變身惡麗莎的杜麗莎繼連環鬧參賽者及擘開超級巨聲鬧DJ Mini後，在前晚播出的節目中，她又惡魔上身，於節目中大喝主持森美；當另一評判陳潔靈評論參賽者時，她更寸嘴挑釁，四圍辣火頭犯眾憎。
杜麗莎為無綫《超級巨聲2》擔任評判後，惡行無日無之，一眾參賽者及DJ Mini都曾經啞忍其打鑼聲寸嘴。前晚節目播出，惡麗莎幕前現形，喝到主持森美頭耷耷，味滲透錄影廠，之後她還公然挑釁Miss Chan Chan陳潔靈，網民隨即起哄，紛紛留言「有戲睇」。
前晚杜麗莎在節目中，先是失驚無神大喝森美：「笑乜呀你？」當參賽者梁皓婷唱罷一曲《儍女》後，杜麗莎振臂歡呼站立支持說：「你用你自己嘅方法，揀嘅歌好。」陳潔靈給評語時，則認為她自創拍子，未能將林振強的詞意表達出來，又稱她感情過份氾濫。
杜麗莎未等陳潔靈講完即反駁：「我感覺呢個少女真係儍女。我感覺到佢講緊自己嘅古仔。」陳潔靈本想辯解，但杜麗莎霸咪續說：「佢個拍子你話走，其實佢自己改個beat，我感覺到佢令到首歌唔同咗。」然後望向身後觀眾示威。陳潔靈再解釋時，杜麗莎卻擰歪面。
惡麗莎霸氣凌人，陳潔靈昨接受電話訪問時仍維護她說：「咁節目咪好睇囉，我哋冇嗌交、冇敵對，大家睇呢啲節目唔係想有火花咩？」她評論參賽者時，杜麗莎無禮插嘴，陳潔靈說：「切磋啫，大家有唔同立場，互動性啲。」杜麗莎被指態度惡，陳潔靈只說：「佢錄呢幾輯節目嘅時候好忙，因為佢做緊演唱會，我估佢有壓力。以我識佢，佢本身冇掩飾過，係咁直腸直肚o架啦。」
陳潔靈又謂：「今次大家對答突破過往咁多集冇出現嘅問題，每人有唔同觀點，咪好囉，節目冇人睇就唔會有人講啦。」她表示兩人私下是好朋友，杜麗莎的性格比較急，「佢講廣東話未必係佢最好演繹，喺好急時候可能令人覺得佢倔咗啲，佢係咁o架，佢平日都係咁玩我哋嘅。」提到杜麗莎喝森美，陳潔靈笑謂：「佢玩啫。」
from:
http://hk.apple.nextmedia ... art_id=14087506
