陳豪、楊怡、吳卓羲同鍾嘉欣噚日為無綫劇集《點解阿SIR係阿SIR》返到將軍澳電視城試造型，今次陳豪會做卧底，混入學校做阿Sir，仲會同楊怡、鍾嘉欣同吳卓羲有一段四角關係，監製劉家豪仲搵咗一班飾演學生嘅演員，着住校服唱最近hit爆嘅《Nobody》。
近期多數飾演「電車男」嘅吳卓羲，今次變身做重案組督察，講到之前有報道話佢喺內地拍劇賺人仔賺到笑，佢話：「邊有呀！我拍完《團圓》之後休息咗三個星期，邊有時間去拍劇，時間咁少最多都係去登台，有得登台梗係好，多多都唔介意，只要度都期就得。」雖然登台好搵，但係點都比唔上拍劇，吳卓羲就話：「其實呢段時間都有人搵我返內地拍劇，不過好難夾到時間，唔係話去深圳拍完就趕返嚟拍，所以前前後後都推咗二、三部。」
問到佢搵少咗幾多錢？吳卓羲死都唔肯講，只係話：「唔好講呢啲嘢喇，公司嘅劇點都要拍，我哋唔係講錢，最緊要係拍得開心。」不過吳卓羲最後都默認損失7位數字嘅酬勞，佢仲笑住話：「唔緊要喇！我希望喺登台嗰度搵番。」
此外，飾演體育兼通識老師嘅楊怡就話：「阿媽最想我做老師同警察，我拍戲全部都試過晒，總算滿足晒阿媽嘅心願。我今次仲會着校服扮番學生，我試完造型之後都覺得自己好『卜卜脆』同『卡娃兒』。」
from:
http://hk.apple.nextmedia ... art_id=14044366
