屢傳懷孕的劉嘉玲，最近又被指有喜。久未露面的嘉玲昨日出關，穿性感鬆身裙在中環出席珠寶品牌晚宴，但仍敏捷地穿4吋高跟鞋跑來跑去，46歲的她直認未升格做媽咪，但樂觀表示「仲排緊隊」，吩咐記者過多幾年才恭喜她。
年底便46歲的劉嘉玲自08年和梁朝偉結婚後，求子心切，一度停工、戒夜蒲、做運動，調理身體等做媽咪。可惜，兩年來屢傳有孕的消息，都食白果。近月劉嘉玲閉關休息，又穿鬆身衫，隨即傳出她已成功懷孕，但與此同時，她又被影到在山頂跑步。
劉嘉玲昨日在中環出席珠寶名牌Chaumet 230周年晚宴，戴上逾千萬珠寶配Lanvin鬆身藍色裙，但嘉玲身形瘦削，穿4吋高跟鞋的她跑來跑去影相，全無孕味。嘉玲直認未有好消息：「我真係未有！仲係排緊隊！」她心情甚好說：「有時一個禮拜話我有咗，一個禮拜話我小產，精神分裂喇。我好健康，身邊嘅朋友都戥我心急，不過順其自然。」
對外傳她人工受孕及搵代母生BB，嘉玲說：「絕對冇！我都去到40歲不惑之年，冇嘢係必需要得到嘅，我哋兩個都好幸福，都好珍惜現有嘅嘢。」問她是否遲多幾年才生？她說：「過多幾年囉，大家有共識。」嘉玲直認愛小孩，但不會領養，她更澄清自己拜佛，不是求子：「我皈依佛教，同埋喺屋企拜佛，唔係呢個原因，我係求寧靜，我去印度見大寶法王，唔係求子，係求智。」她表示偉仔、雙方媽咪都沒有給壓力，自己有喜一定會公佈，但不會為趕潮流而急生。
同場還有何超瓊、何超盈、譚筠怡等名媛出現。超盈被問到超儀不友善言論時，大賣口乖說：「我哋係識得，OK o架，我叫佢Josie家姐，好期待呢個影后家姐嘅新片，佢之前嘅《蝴蝶》我都有睇，做得好好。」更謂若Josie開戲找她客串，也不會托手踭。她更澄清Josie並非叫四姨太梁安琪做阿四，超盈說：「我哋一齊探過爹哋，佢叫我媽咪做安琪。」
from:
http://hk.apple.nextmedia ... art_id=14044297
