憑34C上圍被封為新咪神嘅奀星梁政珏，07年加入TVB以嚟，除咗條事業線同埋緋聞外，其他嘢真係乏善可陳，但佢對於曝光依然進取，千方百計博出位。連日嚟大批記者聚集喺跑馬地養和醫院採訪張栢芝生仔消息，噚日梁政珏就由潮牌Ground-Zero老闆兼設計師男友朱鑫駿（Eri Chu）陪住一齊現身養和，成功吸引現場近半百嘅記者注意，又俾佢博到上鏡。
笑晒望鏡
噚日下晝1點，踢拖襯短褲、戴黑超嘅梁政珏同Eri着V領黑白情侶tee前後腳到醫院，15分鐘後木無表情嘅Eri自己搭的士離開，撇低女友獨自求醫，不過梁政珏就明顯緊張上鏡多過睇醫生，坐喺大堂時仲鬼打咁精神兼送上笑容回眸望鏡。
梁政珏睇完醫生後，就同記者自爆因胃炎唔舒服，問佢點解男友會走先？佢就一味笑。女友胃炎，Eri竟然就咁走咗去，梁政珏就話：「我唔expect呢度有咁多人吖嘛。」不過醉翁之意不在酒，佢嘅司馬昭之心，都怕且路人皆見。
上月Eri被拍得同薛凱琪（Fiona）夜蒲老蘭，有傳梁政珏葡萄Fiona，即黐譚詠麟力捧新仔王宗堯示威，日前梁政珏仲自稱單身，點知轉頭就拖Eri陪睇醫生，善變度驚人。Fiona就冇佢咁好氣，對於梁政珏又同Eri行埋，就表示冇回應。
另外，甄子丹姨仔汪圓圓噚日亦蹺住爸爸去養和，但一見記者即縮手，仲雞咁腳走入大堂。
