曹敏莉與金融界男友張家傑復合後將於年底結婚，她昨日春風滿面戴上3卡求婚鑽戒分享喜悅，她透露將在香港簡單擺十幾圍喜酒，更會響應環保不吃魚翅改吃燕窩，婚後會繼續開工，直到成功造人為止。
曹敏莉宣佈年底結婚，將和相識5年的金融才俊張家傑（Jacky）拉埋天窗，剛自美國回港的曹敏莉昨日在中環出席慧妍雅集記者會，戴了3卡求婚鑽戒亮相，全程開心甜笑，難掩幸福之情。
曹敏莉謂已開始和朋友商量婚禮，傾向一切從簡，她說：「日子家定喺年尾或者下一年，唔會擇日。同啲好朋友、屋企人咁，擺十幾圍，到時唔會有表演，都係食餐飯咁，應該西式儀式食中餐。」她更響應環保，擺酒不會用魚翅，曹敏莉說：「唔會食翅，會用燕窩代替，屋企人都OK，家啲老人家都好環保。」至於場地、婚紗、珠寶首飾等，則有不少贊助，但曹敏莉大部份婉拒，她說：「我唔想好似賣廣告咁，老公又係圈外人，總之一切簡單出發。」
曹敏莉透露會由妹妹做伴娘，她和TVB的合約上月已到期，問到嫁作少奶奶後還會不會拍戲？她說：「Jacky唔反對我做嘢，我同TVB都仲傾緊啲約，如果未生小朋友，都想做嘢。」是否想快點生兒育女？她說：「係呀，我想生一個仔一個女，老公就想要四個。」
曹敏莉05年往美國紐約修讀珠寶鑑證課程時認識Jacky，兩人拍拖兩年後分手，半年前復合。早前曹敏莉到紐約見Jacky，Jacky在中央公園送上3卡鑽戒求婚，全程還找來朋友客串狗仔隊偷拍。
from:
http://hk.apple.nextmedia ... art_id=14016380
