由成班香港小姐組成嘅慧妍雅集，以往都係朱玲玲、趙雅芝話晒事，不過今年7月趙雅芝正式交出個會長位俾03年四料港姐冠軍曹敏莉。換句話講，依家新話事人就係曹敏莉。
咪以為慧妍雅集冇乜搞作，其實周不時都會搞吓活動，淨係約班幹事出嚟開會，夾時間都有排夾，不過估唔到新話事人又幾有號召力喎！早幾日慧妍喺中環Landmark Cafe開會，曹敏莉全程lead住個會，表現進取，「元老級」王愛倫則喺身邊撐住。佢哋仲邊食邊開會，有講有笑，睇嚟大家都好接受呢位新任會長噃。
開完會，曹會長仲有時間去買蛋糕，心情大靚嘅佢全程笑晒，似乎好享受做慧妍話事人。
為慶祝慧妍30周年，早前40幾位港姐聚首一堂錄製特備節目。新任會長曹敏莉（圈頭）更同一眾殿堂級港姐企前排。
