現年31歲嘅03年港姐冠軍曹敏莉，佢三年前嫁咗畀金融才俊張家傑，前年生咗囡囡張逸晴（Dora），婚後曹敏莉減少咗幕前演出，專心相夫教子，但有時都幫慧妍雅集搞慈善活動。曹敏莉早前仲挺住巨肚出嚟，話咁快噚日佢就喺微博公佈生咗囝囝Marco嘅好消息，曹敏莉仲貼咗自己左手抱住囝囝，右手攬住大女Dora嘅相，三仔乸好幸福，背景就係醫院病床，相信係佢啱啱生完，急不及待將喜訊傳出去同大家分享。
前港姐曹敏莉噚日生咗囝囝，同長女Dora湊成好字。
老公陪入產房
相中所見，曹敏莉嘅精神同臉色都好好，佢仲留言：「細佬出世了！多多（Dora）第一句就興奮地講『I see Marco啦！』，作為媽媽，聽到心都甜晒，好多謝大家的祝福。我相信他們兩姊弟一定會有很多愛陪着長大！」長女Dora已經兩歲，生得好似媽咪咁靚女，至於新生嘅細佬都好可愛，嘴仔似足媽咪。
馮仁昭噚日打畀曹敏莉，佢好興奮話：「係呀，Marco係今日中午出世，佢重7.8磅，呢次我係剖腹，老公陪我入產房剪臍帶，佢捉住我隻手畀好多鼓勵我，𠵱家我嘅心情仲好興奮。」曹敏莉話出院會用人奶餵BB，呢胎湊成好字，所以肚皮正式收工。
曹敏莉囝囝Marco出世重7.8磅，嘴仔似足媽咪。
曹敏莉早前為囡囡Dora慶祝兩歲生日，三代同堂。
from:
http://hk.apple.nextmedia ... 130928/18440984
