鍾欣桐（阿嬌）自淫照事件後，前晚首次有孭飛電影首映，她以低V露背裙盛裝出席，談到師妹詩雅在戲中有大膽情慾戲，阿嬌自言是專業演員，現階段未有人邀約，故不會想自己會否接拍的問題，她又大讚詩雅有潛質，故常教師妹演戲。
鍾欣桐、詩雅及陳偉霆等前晚到尖沙嘴文化中心出席新戲《前度》首映，監製杜汶澤及導演麥曦茵到場時高舉着Twins的唱片，眾演員大合照時又一齊跳起，故意幫Twins演唱會宣傳，極之硬銷。杜汶澤說：「阿嬌送碟畀我又唔知放邊好，咪攞嚟一齊睇囉。」阿嬌卻說：「我同杜汶澤講咁樣唔係幾好，佢話冇所謂喎。」
戲中詩雅有一場裸背與陳偉霆激戰的床戲，阿嬌表示沒有看過，因拍攝時是清場的，問她可願意拍這類情慾戲，她說：「冇人要求拍，有人要求再諗啦，我係專業演員，唔會成日諗拍乜戲，有人搵拍先考慮。」至於詩雅表示阿嬌常教她拍戲，阿嬌說：「佢係新人，有時見佢拍戲眼神冇焦點咪教佢囉，佢係有潛質嘅演員，希望佢努力。」
杜汶澤則表示詩雅的情慾戲值99分，差1分是因沒有露點，詩雅對此說：「畀我就唔攞呢1分，我唔敢。拍呢場戲好深刻，邊拍邊喊難度好高。」她謂短期內不敢再接該類戲，她說：「我要時間平復，真係唔夠膽露點，但已盡力。」
from:
http://hk.apple.nextmedia ... art_id=13906021
