被喻為無綫新一代咪神嘅梁政珏同高海寧，本來人氣叮噹馬頭，但早前兩人齊齊出席有份主演嘅電影《72家租客》宣傳活動，梁政珏突然着件斗篷「封胸」讓賽，俾身穿低胸晚裝嘅高海寧搶晒鋒頭。梁政珏突然「封胸」，除了因拍性感戲被工作人員笑似AV女外，還因為露得太多，喺中環鬧市遭人性騷擾，被梁媽媽下令「從良」
梁政珏話封胸就封胸，全因出身大富之家。她父親係大律師及地產商人梁衞民，身家逾5億；男友Eri係潮牌「Ground-Zero」老闆。難怪佢錫身啦，真係同人唔同命
梁政珏表示這次訪問肯着低胸衫影相，只為宣傳《72家租客》，將來再有電影要求穿泳衣的話，她會堅決Say no。
梁政珏07年入讀21期無綫藝員訓練班，介紹人正是大律師老竇的世交六嬸方逸華。後台咁勁，梁政珏未畢業即順利派演《同事三分親》中的乖乖女「May May」。本來行開清純路線的梁政珏，08年3月以三點式到台灣拍攝《獎門人取犀Game》，一露成名，一度成為Yahoo搜尋第一位。之後梁政珏亦食住個勢繼續露，角色由電視的《美麗高解像》到電影《美麗密令》都貫徹性感。
本月11日，梁政珏接受本刊訪問，強調唔係刻意行性感，一切只係無心插柳，「當時拍《獎門人》有諗過着T恤，但佢哋話個個都着泳衣，所以唔係我刻意想賣弄身材，而係公司覺得我可以做啲咁嘅嘢，而大家又受落。之後拍《美麗高解像》，古仔講我選美，咁自然要着泳衣，只係大家將焦點放咗去我嘅身材度啫！」
2月10日
銅鑼灣鬧市拍拖
梁政珏話鍾意男仔有風度同有品味，2月10日她與男友Eri Chu在銅鑼灣行街，男友幫她拿shopping戰利品，又小心拖住她過馬路。Eri本身係設計師，都應該合晒梁政珏的要求。
驚人睇唔起
梁政珏出身大富之家，老竇是大律師兼酒店老闆，在北京投資著名的皇冠假日酒店，身家估計逾5億。唔使憂柴憂米的梁政珏，去年開始被TVB安排日露夜露，近日終於頂唔順，「拍《72家租客》時，我俾大口青（王青飾）射水落個胸度，之後返到屋企都有啲唔開心。其實我唔係冇讀過書，我大學畢業，屋企人都好錫我，點解每次做嘢都要攞個胸出嚟sell自己？大家鍾意睇o靚模，鍾意睇肉，呢個潮流迫我做埋一分子。最近因為咁瞓唔着覺，覺得好大壓力，好唔開心，因為我怕社會嘅人睇唔起我，但係我冇o靚模咁cheap。」
直接令梁政珏「封胸」的原因，是在中環當街當巷被西裝友性騷擾，搞到梁媽媽出聲要佢「從良」。「嗰陣播緊《美麗高解像》，有日做完宣傳去中環置地行街，離開時有個西裝友離遠用色迷迷嘅眼神望住我，我即刻扮講電話唔望佢。點知佢竟然行埋我耳邊好大咁『啜』咗一下，雖然冇真係錫落嚟，但我都好驚，即刻跑開打電話俾媽咪。返到屋企媽咪好擔心咁同我講：『你都係唔好行性感啦！』佢哋一直以嚟都好支持我入行，呢次佢哋終於出聲。」
男友創潮牌
梁政珏的男友Eri Chu修讀Graphic Design，雖然只得32歲，但在國際時裝界已嶄露頭角，他與弟弟Philip於03年創立品牌「Ground-Zero」，旋即成為時裝界大熱。
兄弟二人以倫敦為發展基地，將hi-end與street fashion二合為一，成為品牌特色，花了3年時間便打入英、日市場。近年扮credit card及baby lotion的長T恤更成為大賣款式，明星fans包括何超儀、鄭秀文、Twins、大S徐熙媛、莫文蔚等等。不過「Ground-Zero」在港仍未有專門店，其時裝只在D-Mop、Harvey Nichols、Joyce及Sistyr等名店出售。
最大熱的款式就是阿嬌身穿的「credit card」及Sammi身穿「baby lotion」款式。《壹週刊》圖片
《Face》圖片
老竇投資酒店
梁政珏唔聲唔聲，原來甚有家底，父親梁衞民係大律師，專接刑事案件。其後梁衞民轉任德寶電影公司法律顧問，因工作關係認識六叔邵逸夫及方逸華，受到德寶老闆潘廸生重用的他，其後更當上德寶院線的發行商，出品過電影《嘩鬼學校》，身家隨即暴漲。
家住司徒拔道嘉苑二千多萬豪宅的梁衞民，近年改為經營地產及酒店生意，除於上海、北京等地投資大型房地產項目外，亦有份投資北京五星級的皇冠假日酒店，身家估計逾5億。
北京皇冠假日酒店
王晶想簽
又想出位又唔想露的梁政珏，承認自己貪靚，既自戀又愛出鋒頭，啱晒食娛樂圈呢行飯，但覺得無必要作賤自己，所以講到賣肉，她坦言唔係周秀娜同高海寧對手。她說：「我唔夠周秀娜咁硬淨，我真係承受唔到呢啲壓力；我亦唔及高海寧，佢好捱得。」
雖然梁政珏跟TVB有藝員合約，但老竇梁衞民亦忙於為愛女鋪橋搭路找王晶傾約。王晶接受本刊訪問時直認有意簽梁政珏做晶女郎，更大讚她：「佢整體條件好好，特別係個樣靚夠上鏡，加上佢爹哋同我好熟o架！」雖然王晶極有興趣，梁政珏卻十五十六，「我係同晶哥傾過，依家仲諗緊，因為喺TVB曝光率始終高啲。」記者問她父親為何不開公司捧她，她即避談，只說：「老竇唔係圈中人，唔好講佢。」
除了老竇外，男友亦甚愛錫她，本月10日，梁政珏出席完《72家租客》活動，即相約潮牌Ground-Zero時裝設計師男友Eri Chu到銅鑼灣拍拖。當日Eri不停陪她試衫，非常有耐性，梁政珏更情不自禁輕吻男友面珠，sweet到痹。
記者問她跟男友如何相識，梁政珏即時好怕醜咁話：「我哋喺朋友Party度認識，識咗一年，其他嘢唔講喇。」
07年純情出道
梁政珏在21期藝員訓練班未畢業，已被派演《同事三分親》純情玉女「May May」一角，戲中跟蔡淇俊飾演一對。
08年騷胸彈起
梁政珏在《獎門人取犀Game》首度以三點式上鏡，鍊贏同場袁彩雲（右）等女藝員，成為網友熱捧的新一代咪神。
高海寧周秀娜藐爆梁政珏
高海寧Samantha
年齡：23歲
身高：5呎8吋
體重：116磅
三圍：34D、23、34
學歷：理工大學副學士
入行經過：參加《2008年香港小姐競選》三甲不入，現為無綫旗下藝人。
梁政珏Jeanette
年齡：24歲
身高：5呎6吋
體重：103磅
三圍：33C、24、34
學歷：美國Baylor University畢業，主修時裝採購，副修商科入行經過：加入第21期無綫藝員訓練班，未畢業即拍處境劇《同事三分親》。
周秀娜Chrissie
年齡：23歲
身高：5呎6吋
體重：100磅
三圍：34D、22、32
學歷：中學畢業
入行經過：02年漫畫節Game Girl比賽奪亞軍入行。
（左）高海寧：我未試過俾人性騷擾，可能我唔夠佢咁正啦！不過我行性感唔會有壓力，亦都唔覺得cheap喎！都係當做嘢啫！可能佢諗得太多啦！（真實對白）《蘋果日報》圖片
