羅嘉良（撈家）去年底喺北京娶咗內地女演員蘇岩，不過二人婚後立刻要分頭開工，未有時間去度蜜月，呢排佢哋終於夾到假期補度蜜月，先後去咗熱辣辣嘅三亞同凍冰冰嘅北海道，冰火之旅令呢對新婚夫婦感情更加甜如蜜，佢哋近日分別喺網誌上載旅行相晒恩愛。
放煙花食海鮮
撈家同蘇岩婚後各自開工，終於夾到假期，二人小別勝新婚後拍拖旅行，感覺更甜蜜，佢哋先去咗三亞享受陽光與海灘，兩夫婦喺水邊嬉水作樂，份外輕鬆，蘇岩喺網誌透露佢哋呢次係自駕遊，旅程中仲放煙花同勁擦海鮮餐，不過最搞笑係蘇岩踢爆住慣香港嘅撈家喺內地駕駛嘅瘀事，佢話：「我的丈夫（羅嘉良）用很長時間才敢上路開車，想要拼線或拐彎，沒有人會主動停讓，他一度要儍儍的等着。」做老婆嘅蘇岩就話會耐心等待老公去適應。
夫變三船敏郎
兩公婆之後又去咗白雪紛飛嘅北海道過春節，蘇岩喺小樽運河前影咗好多靚相，佢又喺雪地單腳企，動作鬼馬，撈家喺網誌話每次換咗浴袍，蘇岩就叫佢：「我的三船敏郎先生。」搞到撈家啼笑皆非，佢哋都算新婚夫婦，所以雪地碰到一對影婚紗相嘅新人，撈家都默默送上祝福。
