張學友、朱茵與楊愛瑾等昨日在尖沙嘴出席港台劇《沒有牆的世界》啟播活動，學友將於本月底推出廣東碟，其唱片公司環球與無綫的版稅問題還未解決，問學友會否擔心影響唱片宣傳和銷量？他說：「我同TVB都冇約，我始終都係唱片公司嘅人，銷量都係要講天時地利人和，我都有問過公司，公司話根本都冇得傾（指TVB）。」
環球正與其他電視台開會傾合作，學友說：「咁都要搵出路o架，家電視台（指無綫）有幾多做音樂節目呀？都唔夠，久唔久先播個MV，如果有唔同電視台播歌手MV，對歌手都有利。」有傳無綫拒頒獎予由四大唱片公司組成的HKRIA的歌手，學友有否感到對歌手有影響與不公平？他直言：「頒獎禮公唔公平，我都講到口臭，以前唱片公司同電視台係互惠合作關係，歌手上去電視台係一種支持，但家畀好少資源，要求就好多，咁都唔公平，家都唔知變咗乜嘢世界，係咪好大影響就唔敢講，頒獎禮公唔公平都算，咪當係遊戲囉！」
學友顯得滿腔牢騷，他說：「喺互惠性基礎下，應該要畀多啲支持，唔好吓吓自己話晒事，郁啲就封殺邊個，首先口脗都要改啦。」若HKRIA的歌手MV有可能在別的電視台播放，是否能打破壟斷局面？學友說：「呢件事（指版稅）可能係導火線，傾都冇得傾就封殺，好好笑，做乜先得o架，淨係一個台播。呢啲係音樂，多啲人聽先好，應該要畀好大支持，但又唔係喎，係唔係都封殺，到底畀咗幾多支持樂壇呢？權利同義務係相對，就算家唔發生，將來都會發生。」
學友被指拍無綫和邵氏合作的新戲《72家租客》未能收足片酬，他對此說：「我有收足，只係冇加價又冇減價，我又冇收TVB人工，可能TVB藝員係幫公司做嘢，我唔知佢哋收幾多錢，公唔公平要佢哋先知。」
http://hk.apple.nextmedia ... art_id=13610391
