由陳敏之、黎諾懿主演的無綫新劇《美麗高解像》，講述電視台花旦為求上位不擇手段，反映娛樂圈黑暗一面。敏之與諾懿認為娛樂圈並非一個大染缸，敏之更指現實中花旦之間非常老友，只有良性競爭，絕無明爭暗鬥。
劇中飾演吸毒女星的敏之，與徐子珊及伍詠薇鬥到你死我活。現實中，敏之揚言未遇過劇中的事，否認娛樂圈是複雜之地。她說：「唔覺娛樂圈好複雜，其實喺我字典中唔會有『不和』兩個字，因為唔啱傾咪唔傾囉，唔傾仲點會有摩擦。（歌影視三圈邊度最複雜？）聽聞電影、唱歌會較多應酬，反而電視圈好少夜生活。（現實嘅花旦競爭係咪咁大？）良性競爭一定有，不過現實嘅花旦之間玩得好癲，好似我同楊怡、杏兒都成日玩，大家一齊出嚟捱，好多時會互相勉勵，感覺好窩心。」
天下烏鴉一樣黑諾懿就認為「天下烏鴉一樣黑」，並非只得娛樂圈複雜。他說：「我做過好多工作，好似書局、銀行跟住再做娛樂圈，反而覺得娛樂圈最簡單。雖然好多時要講關係，不過好多嘢觀眾都會睇到，觀眾眼睛最雪亮。好似『柴九』咁，做得好自然有觀眾支持。（娛樂圈係大染缸？）行行都係咁，有人嘅地方自然就會複雜，娛樂圈只係一個透明度高嘅社會縮影啫。」
