黎諾懿上年十一月十一日光棍節，迎娶家族做美容生意，身家超過五億嘅前落選港姐李潔瑩，即刻多咗個朵叫「五億駙馬」，黎諾懿就話錢係好懸殊，希望努力工作拉近距離，老婆亦力撐佢話日久見人心。不過噚日有雜誌報導，話黎諾懿因為唔肯跟岳父做生意，所以畀岳父閂水喉，唔單止收番架Benz，之前話會喺元朗買嘅千萬屋都冇埋，最終要住番西貢用萬二蚊租嘅村屋咁話。
馮仁昭噚日打過畀黎諾懿，佢話：「唔係事實嘅嘢唔會回應喇！不過希望佢哋（指雜誌）下次搵張好少少嘅相啦！𠵱家張相好似馬騮咁！」佢身邊即刻傳來相信係佢老婆李潔瑩嘅哈哈笑聲；兩個人心情都咁好，證明冇畀報導影響心情喎！
黎諾懿已經將上年喺濕地公園附近買入嘅村屋賣咗賺錢。《壹週刊》圖片
新屋高價出售
其實，馮仁昭都問過啲知情人，原來黎諾懿之前的確喺元朗近濕地公園附近買咗間屋，但裝修緊已經有人出價求售，而且出手仲好闊綽，所以兩公婆決定賣咗佢，至於架Benz就仲揸緊！知情人仲爆：「佢哋會再揾過第二度，但𠵱家唔急住，因為仲要日日拍劇，就算元朗間屋冇賣都唔會𠵱家搬入啦，貪遠咩！」
撰文：馮仁昭
馮仁昭
from:
http://hk.apple.nextmedia ... 150323/19086064
