大台大大話話都幾十年歷史，多年嚟薪火相傳嘅唔少得就係演員啦！佢哋嘅小生都係一代接一代，有唔少劇都係以老帶嫩，咁先至唔會青黃不接。不過去到近年，大台嘅小生主力都係由外邊簽返嚟，就好似一度簽過亞視嘅陳展鵬、歌手出身嘅王浩信，仲有做過有線同now嘅洪永城等等，佢哋都唔係正宗「親生仔」，睇到底最後一代嘅自家製小生又有邊幾個呢？
就係04年大台為咗雅典奧運力棒嘅「奧運六星」林峯、馬國明、黄宗澤、吳卓羲、陳鍵鋒、黎諾懿，個個都係親生仔之餘，仲夠晒嫩口，當時佢哋仲拍過唔少劇集做男主角，不過嚟到o依家個個都變晒中佬咁滯。
馬國明同黎諾懿多年嚟一直留守喺大台，其中馬國明o依家就喺大台擔大旗，而黎諾懿事業就載浮載沉，o依家做埋爸爸o添！至於黄宗澤就轉簽邵氏主力喺內地發展，吳卓羲就喺2015年約滿大台，不過佢就係今年回巢。
最後就係陳鍵鋒同林峯，陳鍵鋒早年離開大台，仲力數大台小器，佢多年嚟都喺內地發展，都冇被搵過佢返「娘家」。另外，林峯喺14年約滿大台，有指因為唔肯續約仲搞到俾大台封殺o添！
from:
http://hk.apple.nextmedia ... 170804/20111493
