o靚模鄺敏慧（中巴）十二月廿二日到灣仔警署報案，聲稱遭藝人男友崔建邦襲擊，對方更出動到奪命鉸剪腳，導致她手、腳同頸都有多處明顯傷痕，之後鄺敏慧公開多張親密合照及情愛短訊，大爆與崔建邦的親密關係。
事後崔建邦被警方邀請協助調查，由於涉及打女人，崔建邦即時變成「世紀賤男」，形象插水，TVB更即時急停他所有工作。
自此後，崔建邦一直潛水未有露面，但本刊收到另一版本，指事件女主角鄺敏慧向來有自殘傾向，在拍拖短短三個月，兩度以死威脅崔建邦公開兩人情侶關係，事發當日，她在崔建邦寓所亦企圖跳樓自殺……
報警驗傷
十二月廿二日晚，鄺敏慧到醫院驗傷並到灣仔警署報案，當時她報稱因為男友崔建邦風流成性，大話連篇，而向對方提出分手，但男方憂慮親密合照同情話短訊會遭洩露，於是要求鄺敏慧刪除合照同電話短訊，其間男友更向她動武，導致她滿身傷痕，又公開大鬧崔建邦，「佢咁無人性打我。」
翌日，鄺敏慧在模特兒公司內召開記者會，發相兼大爆與崔建邦情侶關係及動粗過程，「佢（崔）先打我個頭，然後搶我手機，跟住箍住我條頸，推我落地，我掙扎佢捉住我就將我壓住，成個騎住我，我好想走，但房門鎖咗。」
鄺敏慧更表示崔建邦不只一次向她動手，「試過有一次佢飲醉咗，摑我一巴。（覺唔覺得崔有暴力傾向？）我唔知可唔可以咁講！」事發後崔建邦一直潛水，被無綫暫停所有幕前演出。
由於崔建邦曾參加散打比賽六連勝，被稱散打王，外間一致認為崔建邦可以使出奪命鉸剪腳一點都唔出奇，而且鄺敏慧聲淚俱下將整個遇襲過程現場演繹，崔建邦由頭到尾都無現身反駁，所以大眾更認定他有做過打女人可恥行為。
兩人嘈到火紅火綠，鄺敏慧擒窗企圖跳樓，死俾崔建邦睇。
崔建邦將鄺敏慧拉番落地，其間出現推撞。
22/12
在事發四小時後，與經理人商議過後，鄺敏慧決定報警並到醫院驗傷，並召集全港傳媒採訪。
開完記者會後，鄺敏慧由前補習天王的經理人Frankie護送離開公司。
兩度自殺
不過據可靠消息透露，當日的事發經過，其實有另一個版本，更與鄺敏慧所講有明顯出入。
「無錯，嗰日崔建邦同中巴（鄺敏慧）的確有嘈過交，中巴要崔建邦公開佢哋拍拖關係，但係崔建邦驚公司唔鍾意，同埋覺得只係啱啱開始都未穩定，唔想咁快公開，但係中巴話model公司一定要佢哋公開，如果唔係接唔到job。男方點都唔肯，之後中巴又話要將啲合照相同短訊公開，又突然間擒上窗話要跳樓，如果佢（崔）唔公開，就當場死俾佢睇。崔建邦第一時間就衝埋去箍返佢落地，個女仔有掙扎，兩個人有推撞，不過崔建邦隻手都瘀晒；個女仔話度門反鎖咗走唔到，根本無可能，而家邊有房門鎖可以喺房裡面反鎖開唔到，不過崔建邦就真係戇居，明知中巴早有預謀，啲相肯定一早有留底，delete嚟都無用啦！」知情者說。
據了解，鄺敏慧並非第一次以死要脅崔建邦，之前她就試過懷疑男友同舊愛唐詩詠未斷纜，搞到自殺要生要死。
「今年嘅十月，中巴突然呷醋懷疑Amigo（崔）同Natalie（唐）仲有嘢，於是喺車度嘈起上嚟，Amigo雖然話同Natalie無嘢，但中巴點都唔信，仲話除非佢肯向外公開關係，如果唔係就唔信佢。當架車駛到去皇后大道中，中巴突然打開車門話要跳車俾車撞死，嚇到Amigo即刻停車拉住佢。」崔建邦身邊人透露。
多仔濫交
除了用硬功自殺，鄺敏慧亦用盡辦法，逼崔建邦公開關係。諸如經常在崔建邦面前數臭所屬模特兒公司HKGenesis，話公司要她出席陪老細飯局，又話她知名度唔夠，好難接到工作，要她公開同崔建邦關係，增取曝光率，否則的話，就安排她去澳門同日本工作，但又無講明要她做乜。
聽見女友受壓迫，崔建邦第一個反應是擔心對方要做一些不道德的「交易工作」，於是四出幫鄺敏慧搭路，希望幫她搵到其他模特兒公司過檔，崔建邦更搵過老友張敬軒幫手，安排她加入軒仔所開設的模特兒公司Model Max。
捱打事件曝光後，鄺敏慧成為各大報紙雜誌頭條人物，聲名大噪，但同時亦有不少人踢爆她濫交多仔，比起花弗崔建邦有過之而無不及。被踢爆曾經姣溝周秀娜男友Avis外，更有消息指鄺敏慧與崔建邦拍拖同時，另外仲有兩個男朋友揸手，當中包括做電腦的Kelvin Wong，以及做銀行的James，她更瞞住崔建邦與James到澳門玩過夜，甚至明知James已經有女友，亦不時約對方短聚，關係十分混亂。
另一條仔
早前鄺敏慧瞞住崔建邦，與已有女友的James去到澳門玩。
在鄺敏慧的發相中，更有一些她與崔建邦友人合照。
之前鄺敏慧試過同周秀娜爭仔（Avis）。
電話騷擾
鄺敏慧在記者會上堅稱自己並非第三者，更否認曾介入崔建邦及唐詩詠（Natalie）的戀情，她強調是在今年參與無綫J2節目《打出十人巷》後，與擔任客席導師的崔建邦撻着，二人相識不足一個月，今年八月廿九日才開始拍拖。
不過，崔建邦與唐詩詠是九月中才正式分手，鄺敏慧第三者身份根本冇得抵賴。另方面，崔建邦的而且確一腳踏兩船，而據二人身邊好友透露，同唐詩詠拍拖五年，崔建邦有多次出軌紀錄，加上鄺敏慧苦苦相逼，唐詩詠才跟崔建邦一刀切。
「條o靚模喪o架，明知自己係第三者都唔介意，成日乜都要贏，真係好勝，當時Natalie都未同崔建邦分手，中巴成日三更半夜send短訊俾崔建邦，最離譜係一日打成過百個電話騷擾Natalie，去崔建邦屋企過夜又專登留低啲女性用品同埋衫，驚死人哋女朋友唔知，擺明係要示威，家啲後生女好醒，一早就有部署。」知情者說。
24/12
唐詩詠與好友梁靖琪到尖沙嘴行街，二人血拼個多小時後，各自拿着一大袋戰利品，其間，唐詩詠被問到有否被「鉸剪腳」夾過，更爆笑了出來。
26/12
唐詩詠接受訪問時，一度眼濕濕，極力維護舊愛，揚言：「我冇俾人打過。」
處處維護
崔建邦闖禍，向來視他為愛將的陳志雲，下令他閉關思過。連日來龜縮，前度女友唐詩詠卻成為追訪目標，但她依然處處維護對方，強調二人拍拖期間從未被打。上週六（十二月廿六日），唐詩詠出席遊戲展活動時，對於有報導反指鄺敏慧不滿崔建邦仍不停收到她的短訊，雙方經常發生爭執，聽到有關提問時，一臉委屈的唐詩詠激動得眼紅紅：「我抖唔到氣呀！係咪應該調返轉呀？」
本刊事後訪問唐詩詠，對於是否遭人騷擾，她承認確曾受到電話騷擾：「試過一日之內接過一百個冇來電顯示，兼且打嚟又唔出聲嘅電話。」至於可曾見過男友家中有其他女性用品時，唐詩詠則說：「唔開心嘅嘢，唔想再提。」
崔建邦同唐詩詠拍拖接近五年，經常以情侶檔搵錢，但因男方多次偷食，兩人多次離合。
錢銀女人
崔建邦Amigo○四年與一同主持《K-100》的唐詩詠撻着，○六年尾，曾因男方被揭夜蒲，兼搭上模特兒Louisa而鬧翻。幾番離合，○八年二人又共賦同居，但Amigo未改花弗，今年初被拍得與徐淑敏結伴夜蒲，有指二人在場內手拖手，態度親暱。今年五月，Amigo與好友側田拖女夜蒲，更當街與長腿索女貼臉「挹」，又明目張膽狂摷女伴手袋。Amigo八月為商台及J2節目《十人巷》任評判而結識中巴混血參賽者鄺敏慧（人稱中巴）。
「崔鄺」拍拖四個月便出事，鄺敏慧上週二（十二月廿二日）到警署報案，自稱與Amigo因其手機短訊及照片問題爭執，有人將她毆傷，被送入灣仔律敦治醫院驗傷。
情債纏身外，兩個月前，崔建邦同母異父的哥哥陳明輝被追債不遂，債主轉向他追數，Amigo以受害者姿態在經理人陪同下到長沙灣報案，指受到電話恐嚇。踏入三十歲的Amigo官非、女人纏身，有排煩。
因為與徐淑敏拖手夜蒲傳出緋聞。
鄺敏慧（Elizabete）
國籍：中國及巴西混血兒
年齡：20歲
身高：165cm
三圍：32、23、34.5
入行經過：生於香港，九歲移民巴西，去年返港後經朋友介紹入行，現屬HK Genesis模特兒公司旗下。今年八月，鄺敏慧參加森美主持的電視節目《打出十人巷》，與任客席導師的崔建邦傳出緋聞。
