煙民劉威煌同女伴飲完一round，再叫多round啤酒飲過，兩個仲爭住俾酒錢。
亞視嘅《亞洲星光大道》已經選出冠軍人馬，但無綫嘅《超級巨聲》仲有排玩，如果大家有留意嘅話，一定知道邊個係香港隊隊長劉威煌，佢上次同Mr.合唱《如果我是陳奕迅》現場反應勁好，連當日評判之一嘅王菀之，都大讚唱得出色。
劉威煌每次比賽都有穩定表現，加上唱rock唱情歌都掂，絕對有巨星風範，亦最為外界留意。上個禮拜四（十日），《壹》仔夜晚十一點幾响蘭桂坊，撞見劉威煌同一女子二人世界有講有笑。
夜蒲唔瞓已經夠傷聲，仲要啤酒飲完一round又一round，最大鑊原來劉威煌係煙民一族，又煙又酒又夜蒲，睇怕主持之一嘅劉美君，係時候發揮阿媽教仔精神，教劉威煌養聲之道。
之前劉威煌同Mr.合唱《如果我是陳奕迅》，由於機件故障要重錄，現場觀眾同評判都唔介意「安歌」多一次，證明劉威煌的確有料到。（《蘋果日報》圖片）
