側田自出道以來緋聞不絕，同林苑嘅緋聞傳了多年都未能開花結果，近日佢同年僅22歲嘅o靚模曾雪華過從甚密，馮仁昭諗住今次側田會定性啲，點知畀人花弗感覺嘅側田早前又被指喺曾志偉嘅生日派對上借醉抽水，仲話佢摸味之天使「香蕉」王淑玲嘅屁股，雖然之後兩人都出嚟否認其事，但側田嘅形象就認真麻麻。
側田、劉美君、呂方等前晚就到咗將軍澳電視廣播城為《超級巨聲》進行錄影，形象直插谷底嘅側田竟然唔識死，就連當晚16歲嘅參賽者何雁詩都唔放過，除咗開聲大讚佢唱歌了得外，仲自爆話：「我上次講過如果佢攞冠軍我就畀個hug佢。」側田話口未完就走埋去攬住人，雖然嗰位妹妹仔都好受落，但係主持人劉美君就睇唔過眼，仲暗寸話：「我唔想講太多，唔想側田覺得我針對佢，你唔好只係講女參賽者，都應該畀啲評語個男參賽者。」
連另一位評判呂方都取笑側田冧女多過仔，眼見同何雁詩對決嘅海俊文（海俊傑胞弟）以一分之差落敗時，呂方即抵死踢爆話：「嗰一分係側田畀咗個女仔。」令身旁嘅側田好鬼尷尬。
此外，曹格噚日到商台接受訪問，對於做《超級巨聲》主持嘅表現失準，佢話：「始終做主持唔係我嘅強項，加上我又唔識得睇中文，所以到錄第2集嗰陣，索性唔睇稿即場發揮，我覺得自己嘅表現反而好咗。」
