疑似慾照流出謝安琪喊講陳奕迅「話我勾佬好侮辱！」

自今年5月謝安琪（Kay）在紅館開處女騷，和陳奕迅（Eason）的緋聞一爆收唔番。
愈傳愈誇，「廢柴老公」先開口，又晒紋身又高呼：「唔好搞我老婆」；但仍未息「民憤」，Kay再被彈又囂又走音，天后一鋪天堂落地獄；上週再有網友惡搞將疑似Kay姐慾照流出，題為「淫Kay同陳生真係有嘢！」。

忍足大半年，上週五謝安琪首度聲淚俱下親向本刊開腔，大談與Eason相識經過，以及受辱內心世界。「我覺得唔可以再忍受，我係清白嘅，呢啲相一睇就知係假……呢件事（被屈勾佬）好侮辱，侮辱緊我人格！」
出得嚟行，預咗要還。Kay姐聲明最後一次回應，下不為例！大家明就明。

今年5月Kay姐在紅館開處女個唱，與嘉賓Eason合作後，即傳二人已暗交一段時間，更不時以SMS傳情。最新搞作，竟有網友發布一張疑似Kay和Eason的慾照，面對嚴重指控，Kay上週五出席完「麥當勞」騷後，其經理人夏森美要求只可訪問，不能有攝記同場的情況下，記者在保母車上與Kay對話，其間Kay激動得聲淚俱下。

上週三有高登網友post咗張疑似謝安琪同疑似Eason嘅床照，相中嘅瞓床女表情極冧，旁邊疑似係Eason嘅啜嘴男，塊面就畫咗個心形圖案，遮住晒，明顯係蓄意等人認定佢係Eason。

網友仲專登搵張Eason側面相key落AV阿Kay身邊個啜嘴男度，等人錯覺係Eason，有心惡搞喎。

高登網友除咗post咗張疑似Kay床照，仲起埋題「淫Kay同陳生真係有嘢」，非常有敵意砌Kay。

承認SMS
「唔想回應係唔想呢啲嘢一路滾大落去，呢啲唔係話題，係去到好嚴重去侮辱一個人，我諗我由加入樂壇到今日，都冇準備要面對呢啲嘢，冇想過有人咁壞心腸，要不斷摧毀我嘅事業、摧毀我嘅人格。」
至上週六，Kay平復心情後，細說與Eason關係。「同Eason有幾friend？好朋友囉！因為同公司真係會講電話，新年、聖誕會傳啲大圍SMS！同Eason係入咗家呢間公司（環球）先識，工作上有時會討論吓，但私底下嘅嘢或者自己嘢，我哋都唔會成日傾偈，見到面會傾偈囉。」

緋聞爆出，Eason還主動SMS謝安琪和張繼聰（Louis）兩公婆。「其實佢都好好嘅，當有新聞寫到好影響我哋兩家人，佢除咗SMS我，佢都有SMS Louis（張繼聰），叫我哋唔好氣餒，努力工作就係最好嘅反擊。佢會send佢一貫好幽默嘅message畀我哋。（你會唔會回覆，甚至send番畀阿徐？）咁我同阿徐真係唔熟，亦都冇佢電話就真！」

唔想見人
愈講愈激，Kay說曾經想過避世。「我有講過悔氣說話，即係覺得咁辛苦為乜，我都係想出一分力，點解要搞到自己咁辛苦啫，其實有諗過好洩氣想匿埋，但我覺得自己唔可以咁囉。」
被冠以「廢柴老公」的張繼聰，面對種種負面新聞，內心固然難受，不過對住備受更大壓力的老婆，人夫更加要撐住。「呢件事（被網友唱淫Kay、勾佬）好侮辱我，亦侮辱埋我家人。其實佢（張繼聰）都好難過，佢喺旁邊睇，佢都覺得好難為我，更加要互相支持，我哋鍾意自己嘅工作，亦願意去堅持。」

張繼聰鬧爆惡搞：唔負責任

張繼聰上週五（20日）出席活動後，對記者直斥惡搞相片的網民十分無聊。
F：有網友post咗呢張相？（記者遞上照片）
張：（望了望即擰歪面）呢啲係好唔負責任嘅行為！雖然影響唔到我，但影響到我嘅家庭成員，呢啲人好唔負責任、好唔成熟。
F：係咪對Kay好大影響？
張：唔好以為匿喺屋企造相冇問題，我會同律師講，保留追究權利！
F：想破壞你哋家庭咁喎！
張：我百毒不侵！

兩家回復平靜
Eason今年5月在Kay演唱會上，同Kay貼晒頭唱情歌，仲叮囑阿Kay唔好同老公搞咁多嘢，因此被懷疑撻着。不過自緋聞爆出，Kay向記者透露，Eason會同她講笑：「以後我哋化妝都唔好坐咁埋嘞，唔係人哋又有嘢講嘞！」、「你唔好飲水呀，可能又會關我事o架！」Eason真爆笑。
陳太徐濠縈上週一（16日）帶埋囡囡康堤捧老公同祖兒的「拉闊」騷，一家三口晒溫馨。

貴為天后的謝安琪唔介意去平民餐廳和民食飯，有老公陪，食乜都開心啦！

Kay上週四（19日）同老公囝囝到將軍澳東港城家庭樂，Kay小鳥依人搭住老公手臂，溫馨滿瀉。

網上熱講AV Kay
疑似慾照流出，人有相似就真係唔奇。因為去年已有網友將一個激似Kay樣嘅AV女優相放上網，仲畀咗個朵佢叫「AV版謝安琪」添。據知呢位女優名叫蜜井Towa。
呢位蜜井Towa擁J Cup誇張身形，樣貌更有7分似謝安琪，特別係個嘴仔極似，難怪可以擾亂觀眾視線啦！