陳法拉累天明自揭求婚

陳法拉、李司棋、伍詠薇、鍾景輝、麥包和洪天明等，昨日在金鐘香港公園宣傳劇集《有營煮婦》，陳法拉與洪天明、伍姑娘及麥包均穿上結婚禮服，即場上演求婚記。


穿上婚紗的陳法拉明艷照人，她表示很希望組織美滿家庭。

洪天明手持鮮花跪地向陳法拉求婚，卻不慎自爆曾向女友求婚。
天明以99支玫瑰向法拉跪地求婚，一時口快踢爆自己曾經求過婚，在旁的伍姑娘即時高呼：「周小姐（周家蔚）！」嚇得天明尷尬喝止：「咪嘈！」並解釋只是童年時玩過求婚遊戲。陳法拉表示從未試過有男友求婚，她因為喜歡小孩，所以很渴望將來有美滿家庭。麥包以巨型鑽戒向伍姑娘求婚，未待麥包開口講求婚對白，伍姑娘已主動反跪地說答應，她說：「以前我都係主動開口話結婚先嫁到個好老公。」

陳法拉及伍詠薇昨日穿上婚紗，為劇集《有營煮婦》宣傳，洪天明即場示範向法拉求婚，卻口快快自爆之前試過求婚，事後又唔認數死兜，認真(火羅)爆。


伍詠薇稱女士如遇到Mr.Right要主動出擊。

洪天明事後死兜說：「我話細個玩嗰啲求婚咋！（秘密結婚唔認？）冇呀！希望大家體諒，正如我之前拍拖唔講，有時原因係未穩定、對方家長唔想，到畀人知嗰時都分咗手。（你講徐子淇？）唔好開名，總之係我以前拍拖經歷。我都想做好老公、好爸爸，想五年內結婚，想求婚時有咁浪漫得咁浪漫，不過冇得急。」

法拉要五卡鑽戒法拉則說：「冇人向我求過婚，希望第時啲男仔花心思，大鑽石一定要有，要遮住手指嘅，五卡啦！我諗會嚇走啲男仔。（Neway太子爺買得起？）唔知邊個買得起，我都想遇到perfectman。（接受奉子成婚？）有ＢＢ唔係問題，但唔好為ＢＢ而結婚，本末倒置。我事業啱啱起步，本身又鍾意家庭同小朋友，係黐身媽咪，唔會捨得掉低ＢＢ，所以好難講幾時結婚。」

伍詠薇主動出擊伍詠薇則示範女向男求婚，她說：「女士們見到Mr.Right不妨做主動，我都係向我先生求婚，幸福要自己爭取，我結婚十年都咁快樂，唔係扮出嚟，而係主動出擊，得來不易。」

文：影視組


洪天明即場示範向法拉求婚，期間卻口快快自爆之前試過求婚。