07年回港發展的孫耀威，與楊秀惠合作音樂電影火速撻着，可惜戀情快來快去，有指老孫難忍楊秀惠黐身，戀情最終一年「貨仔」就玩完。
自稱已回復單身的孫耀威，其實亦不寂寞。本刊收到消息，指他與前女生宿舍成員陳美詩（Macy）暗地裏搭上多個月，最近更秘密在深井一豪宅同居。記者連日跟蹤之下，發現兩人關係穩定之餘，更已經見埋家長。發展如此神速，難怪楊秀惠知道後滿有醋意說：「咪恭喜佢哋囉！」
現年36歲的孫耀威，自去年與楊秀惠分手後，不時將自己想搵女友掛在口邊，更自稱近月所寫的歌曲，都是講述自己單身心態，有意冇意發表單身宣言。
但知情者指，去年他與楊秀惠的感情亮紅燈期間，其實已與年紀細他10年的無綫三、四線姐仔陳美詩（Macy）秘密撻着。去年楊秀惠出席樂易玲生日派對時，楊秀惠見到男友孫耀威攬女，即場呷醋嚎哭，據知此人正是Macy，三人更是一起拍攝劇集《Click入黃金屋》，難怪楊秀惠才無名火起。「嗰陣Eric（孫耀威）嫌楊秀惠麻煩，成日黐住晒，感情愈來愈差，反而同Macy鬼咁好傾，冇耐仲拍埋拖，一齊返埋教會㖭！」知情者透露。
Macy星運平
陳美詩（Macy）現年26歲。04年與Toby（梁靖琪）等人合組四人女子組合「女生宿舍」，曾推出唱片及寫真集，但發展平平。07年才成為無綫藝員，在無綫收費電視擔任娛樂新聞主持，亦參與劇集，印象較深刻是《王老虎搶親》及《與敵同行》，而即將推出的《古靈精探II》，她亦有份演出。
做跟得男友
一向愛蒲的孫耀威，與Macy拍拖不久便受她感染，重返教會之餘，更於去年11月正式受洗。決心洗底做乖仔的老孫，對Macy亦呵護備至，雖然未有意公開戀情，但他亦不避嫌管接管送。知情者說：「Eric好錫Macy，如果司機放假，佢就會自己揸車接送。佢兩個感情好好，成日喺屋企玩煮飯仔，仲一早見埋家長。」7月26日，下午4時，記者就發現孫耀威在青衣城做完商場宣傳活動後，駕車到長沙灣接Macy，一同返回深井御海峰愛巢。
屋企衫見家長
晚上7時多，老孫更有親友到訪，原本將全屋窗簾拉上的他，突然把大廳的窗簾拉開，讓家人觀望超靚青馬大橋海景。此時換了Ｔ恤短褲的Macy，拎住聖經從樓上房間下來，一同圍在餐枱睇聖經。當時只見老孫與Macy全程黐到實，有講有笑。而Macy亦相當細心，為老孫斟茶遞水，尤如家中女主人。
楊秀惠：恭喜佢哋囉
對於舊愛孫耀威新戀情，記者趁楊秀惠出席動漫節活動時訪問她，她甫聽到舊男友有拖拍，即碌大雙眼。
楊：吓，係咩，邊個呀？
記：Macy呀！
楊：邊個Macy呀？
記：同你合作過《Click入黃金屋》o架！
楊：（酸溜溜說）哦……好吖，佢係好女仔嚟……
記：咁你戥唔戥佢哋開心？
楊：（對答開始混亂）之前有啲唔係咁好嘅新聞影響咗佢（指孫），依家拍拖咪好囉，即係無影響到啦。
記：你指之前佢話你大細臉嘅新聞？
楊：（強裝笑容）佢係好男仔，咁Macy又係好女仔，係好事嚟。
記：佢哋已經搬入新屋同居。
楊：（聲音高八度）吓！真係o架？咁我一陣咪要打去恭喜佢囉。
記：有傳你喺去年樂小姐個生日party度喊，係咪因為嗰時知道孫耀威同咗Macy一齊？
楊：（借機離開）吓……哎呀，我要上台做嘢喇！
驚青回應
至於陳美詩，一聽記者致電恭喜她蜜運，即方寸大亂，問非所答，不停以「咩事呀？」、「咁搞笑！」作回應，之後更強撐說：「唔通我有劇（《王老虎搶親》播映中）幫我宣傳？」記者再問她見過老孫家長未？她則趕住收線說：「我要入廠喇，晏啲再講啦！」說罷她隨即將電話飛到call台，至（5日）截稿前仍未有回覆。
拒回應
孫耀威自去年11月受洗後，講過要遵守十誡，當時他說︰「以前俾人問拍拖時都會講大話，依家我會選擇唔答。」如今再被揭發戀情的他，果然選擇唔回應。本周三下午3時，他出席聯合國兒童基金活動，被問到與Macy同居一事，他一臉尷尬，急步走人，助手即上車擋駕︰「唔好意思，同今日活動冇關嘅嘢，唔回應！」
低密度別墅
孫耀威和Macy同居的私竇位於深井青山公路的「御海峰」，前身是「彩濤花園」。07年信和置業集團斥資5千萬大翻身。全個屋苑僅得16幢半獨立式別墅，月租約六萬五千元起，全是倚山面海設計，面向青龍灣。每幢均眺望青馬大橋靚景，面積千八至二千多呎，全為三房設計，每幢均有天台、陽台、私人後花園。
御海峰是亞洲首個引入先進的「多區域音樂系統」，住客能在家中每角落，甚至花園，享受高質素音響。
情人變敵人
孫耀威跟過去的緋聞女友，都因合作而撻着，不過緣盡時，往往做不成朋友，每次提及ex，都句句有骨。唔通反轉豬肚？
孫耀威跟應采兒05年拍內地劇《美麗傳說》撻着，被拍得一個飯盒兩份食。孫耀威更公開讚她：「我揀女友要性格、內涵、樣貌、身材、學歷和孝順都合格，而采兒絕對係合格以上。」不過拍拖年半，有傳女方情傾內地演員黃曉明，被撇的孫耀威，被問到二人是否仍是朋友，毫不客氣地說：「沒必要去維繫，有就有，無就罷就﹗」
07年11月，老孫跟楊秀惠因拍音樂電影《分手公司》一拍即合，當時把座駕寶馬任她用不特止，並於何文田同居，又公開大讚女方樣靚身材正。但拍拖唔夠一年，孫速撇對方。
早前楊秀惠被指因打botox失敗導致大細臉，老孫笑指她「貪平」。及後楊秀惠被爆跟有米主持蘇晉霆拍拖（右圖），老孫亦老實唔客氣表示可以甩難，並說：「咁有錢咪好囉！」
換上T恤短褲的Macy，有如家中女主人，為孫耀威親友斟茶遞水，又為大家準備聖經，全程照顧周到。
7月26日
下午4時多，孫耀威做完青衣城宣傳活動，駕車接Macy返家。
頭戴cap帽的Macy到達深井御海峰愛巢時，先到後座整理雜物，才慢慢返入屋。
孫耀威和Macy回家後一直待在房間，至晚上7時許，孫的家人到達，二人才分別手持聖經，從房間走落客廳。
不久孫耀威、Macy與四位基督徒親友圍埋餐桌查閱聖經，其間孫耀威動作多多（小圖），風騷到暈，更與Macy黐到實。
個多小時後，眾人到天台BBQ醫肚。至晚上11時半，全部親友離開，惟Macy到清晨亦未見離開。
