22歲上位爆胸o靚模Lavina（鍾蕙芝）被指於夜店肉價2千5，不過胸大有腦Lavina層次冇咁低，早前被撞破夜會身家過億、25歲衣架大王太子劉德俊（William），點知太子翌日發聲明澄清，其o靚模女友Fiona（胡希文）接力再鬧，話有人貪圖男友6部supercar同九肚山大屋。
夜會筍盤變是非，其實Lavina亦不愁寂寞，上週六（25日）便拖6呎警察真命男友Alex行街，宅男女神更當眾啜男友兼餵殘廢餐。女神今鋪擺明要示威，太子仔食唔到即刻反晒面，冇乜風度喎！
26/7 真命登場
Lavina男友Alex身高有6呎（180cm），身高166cm嘅Lavina就算着番對3吋platform同男友都差成個頭，發現有記者影相仲下意識瑟縮喺男友身後，安全感返晒嚟啦！
34Eo靚模Lavina（鍾蕙芝）被指搭上25歲、曾跟歌手鄧穎芝拍拖嘅衣架太子劉德俊（William），早前兩人於鯉景灣晚飯被撞到正，男方於報道出街後，忽然發聲明劃清界線，上週五（24日）更對本刊說：「我同佢識咗一個星期都唔夠，點會追佢，我每次都係約佢公司啲人傾嘢，點知得佢一個出嚟，唔係有人放料，點會次次都俾人影到呀？」
太子仔話有人放料，以為Lavina從此金龜夢碎，但原來Lavina一直收埋一名身高6呎、做警察嘅有米男友Alex，Lavina好友說：「Lavina未入行之前已經同Alex拍拖，佢兩個成日都好sweet㗎，Alex好鍾意佢㗎，不過Alex屋企人就唔係咁鍾意Lavina入呢行啦，不過仔大仔世界，Alex咁大個都阻唔到佢，嗰陣佢都追咗Lavina半年幾，雖然Alex做警察，但係家底都唔錯，之前都有架法拉利，不過最近賣咗諗住換過部。佢大Lavina 5年，成日講笑扮得意，氹得Lavina好開心。」
週日（26日）晚，本刊於將軍澳新都城發現Lavina與Alex甜蜜拍拖，其間Lavina主動向Alex嘟嘴索吻，又餵Alex食殘廢餐，同衣架太子撐枱腳各有各食好唔同。二人發現記者後，Alex上前阻攔記者，果然係做慣警察。
F：《FACE》 A：Alex L：Lavina
A：（以手擋鏡頭）你哋邊間㗎？
F：你哋拍拖好sweet喎！
L：唔係呀！佢係我好好嘅朋友嚟㗎，唔好亂寫！
F：（轉問Alex）咁你介唔介意Lavina同衣架太子食飯吖？
A：我唔信Lavina會鍾意咁矮嘅男仔！
L：我只係識咗佢（William）一個星期，完全冇鍾意過佢囉！
F：不過William女友話你貪人九肚山間屋喎？
L：我由頭到尾唔知佢有女朋友，呢件事上面我同Fiona都係受害者！
6呎差佬對Lavina有信心，不過衣架太子前女友鄧穎芝就直指舊愛原來好花心，「佢有好多女性朋友，成日都有好多女仔問佢拎電話同佢玩SMS。」
邊個花心邊個係筍盤，Lavina咁有腦應該識揀啦！
三女一男大龍鳳
25歲衣架太子William父親劉璜坐擁過億身家，旗下公司「鴻基衣架廠」以製塑膠衣架聞名，生意遍布北美洲、大洋洲等地，年商8千萬，屋企有6部supercar，難怪「美少女廚神」Fiona一見Lavina埋身即刻發聲明自稱有咗5個月身孕兼係太子仔未婚妻，保住張飯票。不過，太子過氣舊愛歌手鄧穎芝上週六（25日）接受本刊電話訪問，提起舊愛，雖然好維護，但仍然聽得出有啲不滿，仲話同William出親街都係AA制，富貴仔原來唔多肯使錢。
插孤寒
我同佢拍咗拖都唔係好耐，佢份人係幾好，嗰陣唔係講錢㗎，我隻鑽戒都係我老豆送，冇收過佢任何禮物！行街買嘢都係AA，我自己畀番自己，係食飯佢畀啫。拍拖嗰陣我成日都唔喺香港，最後大家係性格不合和平分手嘅！佢平日好鍾意SMS，鍾意SMS多過講電話！成日都話好多女仔會問佢拎電話同佢玩SMS，我知Fiona喺我同William一齊嗰陣都有成日搵佢！Fiona應該同佢冇拍4年咁耐，好似係2年左右！」
本刊在鄧穎芝友人的facebook內發現昔日二人嘅不少拍拖親密合照，鄧與William雖然拍拖時間短，不過仍結伴出席雙方友人好似EO2飯局，鄧穎芝仲話見過男方父母，感情應該唔錯。
箍飯票
衣架太子個正印Fiona都係o靚模，與Lavina算係行家，佢亦曾上第11集《美女廚房》參加「美少女廚神」。自稱係太子仔未婚妻嘅Fiona上週五發聲明力撐話叫啲女仔唔好因為William有supercar同獨立屋，就想拆散佢哋同放料畀傳媒，率先公開正印身份，似乎想跟呂麗君學嘢。
Fiona曾自稱自己有孕5個月，與William同居4年，今年12月結婚，見當紮o靚模Lavina同男友夜會難怪火燒心啦！不過太子仔忽然殺出個o靚模未婚妻，William就承認Fiona係佢朋友，但就同本刊強調：「肯定唔係我經手！」
我有冇女友我唔想講，我唔想影響到我屋企人，我覺得成件事係俾人整蠱囉！
自爆攞彩
用網名Gloomy嘅William曾於網上討論區HKEPC內自爆自己同Lavina去街，又恥笑班電車只可以睇Lavina本寫真自瀆，似乎同佢話見親Lavina都係為公事有啲出入，佢為咗證明自己真係同過Lavina食飯，仲上載埋自己成堆私相驗明正身。Lavina對此行為表示話：「好無聊！」
過冷河
反o靚模facebook群組於7月4日開始發起，結果浪潮愈來愈大。無綫總經理陳志雲仲開埋口落order禁o靚模上電視，搞到反o靚模愈煲愈hit，最近Lavina同Rainbow明顯少咗蒲頭，上週成個星期都係幫寫真慶功先有見報。不過，o靚模Rainbow、Lavina經理人Admund週一（27日）就向本刊表示反o靚模潮對佢哋冇咩影響：「冇多又冇少到！聽日（28日）都有個慈善首映要去！之後又忙動漫同其他工作！」-(id:kenwchch)
6呎有米差佬
3吋厚底
1吋踭
