時下一大班o靚模橫行娛樂圈，當中剛與古天樂合作《撲克王》的鍾蕙芝（Lavina），除了夠博兼爛做外，最擅長狂露34E上圍，因而成為宅男界中的新一代性感icon。不過這位21歲大胸o靚模原來住公屋、搭港鐵，嗜好蒲7仔、刨八卦雜誌，搵得多但慳到爆。
Lavina近日工作多多，據知她由最初的3,000元做騷價，暴升至現在的13,000元，不過其「身價」十分飄忽，可以吊高嚟賣，又可以零薪酬，如早前名牌Coach舉行活動，Lavina竟不請自來博見報，可見其進取本性。
搭港鐵返漁灣邨
Lavina鍾蕙芝買果汁和雜誌後，便返回漁灣邨香閨。
爛做活動是Lavina上位招數之一，冧fans是其二。大前晚她和周凱盈（Monique）等幾位o靚模在圓方出席首映後，甫出戲院即識做地被龍友及fans任影，其後Lavina和兩名記者齊搭港鐵到柴灣，全程任由記者直擊返漁灣邨公屋過程。不過她進入大廈後，卻從前門入後門出，兜個圈去7仔打躉，最後買了一本娛樂雜誌及一樽果汁便返家，有得睇有得飲，埋單都係30元有找。
