應采兒昨日出席新片《撲克王》的電影開鏡，席間她主動談到男友陳小春稍後與緋聞皇后葉璇合作拍親熱戲，采兒千叮萬囑小春不得越軌，又事先張揚會親自監場，吼實愛郎。
中國星及太陽城集團聯合製作的電影《撲克王》，集合劉青雲、古天樂、應采兒、鄧麗欣（Stephy）及向佐演出，導演陳慶嘉聯同老闆向華強及眾演員，昨日在尖沙嘴為新片開鏡拜神。
故事講述青雲及古仔屬撲克高手，超儀飾演賭后，Stephy為古仔女友爛賭妹，應采兒扮演神秘撲克高手。青雲與古仔均表示，現忙於操練賭徒的花招，令手也有點腫痛。
事先張揚監場
應采兒對男友小春管教甚嚴，不能有行差踏錯。
與陳小春拍拖兩年的應采兒，昨日主動表示小春終於有時間留在港拍攝電影《飛沙風中轉》，她說：「佢終於都返嚟，我哋兩個拍拖兩年，從來冇試過一齊喺香港，淨係試過一齊喺橫店、北京拍戲。」
采兒得悉小春與葉璇在新片中有大量激咀及親熱戲，她知道葉璇很易有緋聞，所以揚言會到場監察，采兒說：「我就係知（葉璇多緋聞），已經叮囑咗小春，叫佢千祈唔好有緋聞。」
擔心被撬牆腳醋意甚濃的采兒坦言擔心二人感情受影響：「小春有同我講，佢同葉璇埋位一見面就又攬又咀，我同佢都未係咁樣，如果唔擔心，我就唔會講出嚟。佢返屋企一定要刷牙，如果唔係唔好錫我。」采兒又表示小春也擔心緋聞，所以連偷望也不敢。
