做咗百萬Benz 車主後，余文樂人憑車貴，埋到郭富城同沈嘉偉堆，早前佢哋經常被拍到結伴夜蒲。三個麻甩齋到爆，所以余文樂上月北上拍新劇《荒村公寓》嗰陣，就乘機近女色平衡下，而呢位女色就係早排被指係馮德倫同徐若瑄第三者嘅張雨綺。
最近喺余文樂fan club 嘅facebook 入面，就擺咗唔少樂仔喺北京拍《荒》片情況嘅相，其中有一張係樂仔同張雨綺嘅合照。相中近乎素顏嘅張雨綺成個身壓落樂仔度，仲主動繑住佢手臂影相，有女主動出擊，樂仔乘勢將個頭挨近，非常親密。
其實拍戲嗰陣，樂仔對張雨綺已經呵護備至，有幕後工作人員爆料，話曾經目睹佢兩個特登坐到離劇組遠一遠，方便撐枱腳，鬼死咁溫馨。再一次證明姣婆遇着脂粉客，呢句說話係啱嘅！
素顏嘅張雨綺，同余文樂頭碰頭肩並肩影相，感情可見一斑。
公餘仲結伴去拜神。
登台做宣傳，兩人亦唔介意企埋一齊。
