拍拖至今年多的○六年港姐亞軍周家蔚及洪天明，去年八月被好友貝安琪踢爆在馬爾代夫訂婚，雖然當事人否認婚訊，不過周家蔚卻不時相約老爺洪金寶吃飯，做硬洪家新抱咁款。
結婚計劃如箭在弦，二人亦睇中位於何文田山的千呎單位，作為愛巢，負責俾錢買樓的洪天明更講明由周家蔚個人名義擁有業權，錫晒老婆。
上週三，二人拍拖買電腦遊戲碟，跟住再到附近餐廳食飯，胃口甚好的周家蔚，邊吃麵包邊跟男友傾偈。
著住同一件外套的洪天明上週二一個人在旺角睇魚，雖然冇收穫，不過全程自得其樂。
睇中何文田山
周家蔚上月底被拍得跟兩男在Volar 醉酒夜蒲，事後洪天明出面力撐女友冇出軌，並指兩男是二人朋友，當時還有兩男的女友在場，周家蔚當晚雖然有飲酒但冇醉。
自從去年初拍旅遊特輯撻着，洪天明與周家蔚拍拖半年即傳出訂婚消息，周家蔚手上亦經常戴着男友所送的鑽石戒指。據知，二人在父親洪金寶催促下，近日已決定買樓結婚，洪天明早前亦曾陪女友到何文田山一帶睇樓。
「自從同Janet 拍拖，天明生性咗好多，佢以前好鍾意出去玩，同成班朋友飲酒飲天光，嗰時做佢女朋友都幾慘，成日都搵唔到佢，又唔知佢去咗邊，所以成日炒大鑊，而家佢變咗好多，鍾意留喺屋企打機，好少出去蒲。佢哋兩個打算買咗樓就結婚，趁而家樓價低，睇啱心水就會即刻扑槌，Janet 同天明都好鍾意何文田山嗰帶啲樓，雖然樓齡高啲，但樓底高、空氣好。」知情者說。
拍拖未幾，周家蔚已經以女朋友身份到球場睇洪天明踢波，當日更被本刊記者拍得二人同車離開。
訂婚消息傳出後，周家蔚出席活動時，左手依然戴住訂婚戒指，但就一味否認婚訊。
上《鐵甲無敵獎門人》做嘉賓，細心的周家蔚替洪天明整理衣衫，毫不避嫌。
去年九月，二人跟洪金寶在滿江紅食飯，新抱仔周家蔚不時遞碟夾餸，服侍周到，難怪被洪金寶大讚人品好。
放工接女友
上週三（三月二十五日）下午，洪天明在九龍城為電視劇《有營煮婦》拍外景，至黃昏六時多收工，他即到旺角接女友，二人在先達廣場行了一圈，再揸車到深水埗高登商場，二人在商場逗留了二十分鐘，買了數隻電腦遊戲碟便離開，之後到附近的馬里奧連鎖餐廳醫肚。
記者致電周家蔚，她承認買樓。「朋友話而家樓價低，係置業好時機，我都開始睇樓。（係咪打算買樓結婚？）我唔講嘞，係咁啦。」
