懷著一顆恨嫁心的佘詩曼，日前才高調叫記者逼緋聞男友鄭嘉穎表態，以為二人會公開戀情之際，事隔一日，阿佘即大改口風，反口否認要嘉穎表態，莫非二人還未得到共識？
緋聞男女鄭嘉穎及佘詩曼早前被影到同車出入，被指地下情曝光，而日前女主角阿佘接受訪問時，就大方認是相中人，表示與嘉穎現在雖是朋友關係，但情侶是由朋友開始，呼籲大家給予空間二人。而問到嘉穎有否追她？她還甜絲絲叫記者逼嘉穎表態。不過事隔一日，阿佘昨日與嘉穎拍攝新劇《宮心計》時，除了合照之外，全程未有任何交流，當中阿佘更反口否認要嘉穎表態，認真耐人尋味。
反口話冇逼表態
昨日阿佘一見記者，即主動講述拍攝劇情，不過一提到日前她叫記者逼嘉穎表態一事，她即反口表示冇講過，更斬釘截鐵表示：「冇咁講過，唔好屈我，我只係話我哋係同事，所有嘢順其自然！」
至於一直對同車報道未有回應的男主角鄭嘉穎，昨日終於開腔回應，他說：「我講嚟講去都係三幅被，多謝本雜誌畀個封面我，不過可以時間好啲，如果喺套劇上先出，慳番唔少宣傳。（會唔會唔車阿佘？）呢啲係平常事，唔知點解咁都可以做封面，我都坐過杏兒車啦。」
時機成熟會結婚
而對於阿佘日前的「空間」言論，嘉穎就謂：「空間大家都需要，感情事留結婚先講，我保持一向唔講態度。（阿佘叫記者叫你表態？）咁得意，親口問吓佢先，緋聞講到冇新意，結婚會通知大家，不過時機成熟先。（幾時先時機成熟？）睇好多嘢喎，好似係老婆本、適合人選咁。（阿佘係合適人選嗎？）時機成熟就知。（係咪同阿佘得共識先講？）唔使，以前咁答，依家都係咁答。」
此外，對於堪輿家麥玲玲指嘉穎與阿佘命格相沖一事，嘉穎說：「唔知喎，做朋友相唔相沖唔緊要，你（指記者）好信麥玲玲
？」
文：影視組
阿佘昨日與嘉穎拍攝新劇，但雙方表現避忌，合照過後就沒有任何交流。
阿佘與嘉穎合照後，就獨自站在一旁。
嘉穎未知是否因表態一事煩惱，拍攝期間心事重重。
