雖然話辣出名，不過這裏亦同其他車仔麵檔一樣可揀清湯底。
咖喱魚蛋冇魚味？失敗！墨丸一咬就散？失敗！有睇星爺套《食神》，炮製一碗俗稱嗱渣麵的車仔麵，皆有學問！位於觀塘工業區有一新開張車仔麵檔「自家制」，招牌菜係勁辣九彩嗱渣麵，筆者即請嗜辣的o靚界女神Chrissie 同大家踩場挑戰！
豬大腸勁粗勁入味，食嗱渣麵，冇佢點得？
自製「好Q 辣」
自家製4 種辣粉、加入咖喱汁研配而成的「好Q 辣」辣醬，連靚女Chrissie 都話犀利，「我本身係勁辣人，麻辣火鍋真係難唔到我，不過呢個辣汁都真係幾犀利，我都要飲番杯奶茶頂一頂。」
自家制車仔麵
地址：觀塘巧明街94-96 號鴻圖商業大廈地下（9383 3062 ）
營業時間：7:00am-11:00pm
$20 食飽你
牛腩、冬菇、豬腸全部自己整，車仔麵店名都直情叫「自家制」，老闆Dicky ：「唔係叫貨，所以我哋可以控制到食物的質素。家吓市道唔好，出去食個茶餐廳午飯都要$35 ，我哋$20 就可以食飽你（不設最低消費，每款餸$5 ，要兩個餸$10 、一個麵$6 加埋都只係$16 ），跟餐加多$3 ，仲送多一杯冇加冰凍奶茶。」筆者在午飯時間（1:30pm ）雖然見不到有勁長人龍，但每隔幾分鐘都有人嚟買外賣，開業唔夠兩星期，人流尚算不錯！
最正就係牛腩，望落乾爭爭，但入口好腍、肉汁好甜，有驚喜。
牛腩有驚喜
九彩嗱渣麵
九彩麵由咖喱魚蛋、豬腸、豬皮、蘿蔔、芝士腸、雞翼、墨魚丸、牛腩、冬菇等9款食品加個麵底，搭多條菜組成。材料多，一次過滿足人類貪婪的慾望。
米芝肥指數：★★★★（615kcal ）
辣指數：★★★
Chrissie 最冧
芝麻魚肉燒賣$5/6 粒
魚肉燒賣加上芝麻及辣汁，口感軟中帶脆，Chrissie 勁冧，猛讚芝麻好香。
米芝肥指數：★（80kcal ）
辣指數：★★
麻辣4 式丸$7
牛丸、墨丸、龍蝦丸及貢丸加入蜜糖一齊燒，熟透後再搽埋辣汁，怕辣記得叫師傅輕手啲。
米芝肥指數：★（97kcal ）
辣指數：★★★
冇冰凍奶茶$10
Chrissie 讚茶味夠濃，飲落夠滑，特點係沖製時以煉奶取代糖水。
米芝肥指數：★（120kcal ）
脆多汁
滷水串燒雞翼$7/ 串
外皮燒至香脆，內裏卻保留鮮甜滷水汁，比一般滷水燒雞翼更惹味。
米芝肥指數：★1/2 （225kcal ）
蔡瀾話齋，好食嘅嘢一定致肥！為咗要食好嘢又要keep fit 着靚衫繼續潮，記得留意我米芝肥指數！愈多米芝肥愈易致肥，一個米芝肥等於一碗白飯（約150kcal），成年人平均每日進食不超過2000kcal （男人）、1600kcal （女人）為健康，潮人睇住食呀！
冇最低消費！Sushi 平爆攻略
魚生、sushi 必屬潮o靚最愛食品3 甲，然而金融海嘯下個個荷包見紅，高消費？「Da 咩」（日文發音等同咪搞）！
食肆結業多過開張，餘下有實力的亦要噱頭盡出。今期《FACE 》即格遍全港，抽出激平日食，仲冇最低消費，就由$1 一個手卷報喜先！
$1 三文魚手卷
9:00pm 後打邊爐會減價人所共知，家連金水壽司店亦玩10:30pm 後全場半價，最近更喺晚飯黃金時間推出$1 一個三文魚手卷（正價$18 ），每個人頭限叫一個，叫一個即走都得！
晚飯時間例有人龍，鬼咩門口標明$1 手卷喎！
金水壽司店
地址：尖沙咀加連威老道8 號地鋪 （2369 0488 ）
營業時間：12:00nn-12:00mn
晚市輪候：約20 分鐘
條件：6:30pm-9:30pm ，每人頭限叫一個。
米芝肥指數：48kcal
$2.25 醬油漬三文魚壽司
板前「動作」最快，早於1 月老闆Ricky 已推出$3 一件三文魚壽司！新加醬油漬三文魚壽司$4.5 一客，等於$2.25 一件。醬油漬本身已鹹唔使點豉油，叫足5 碟都係$22.5 ，已經可以當魚生飯食，激抵！缺點是輪候時間為各餐廳最長，唔齊人亦都唔畀入。
板前的$3 一件三文魚壽司仲仍然生效，必吃！
板前壽司
地址：尖沙咀加連威老道14 號地鋪（3106 2846 ）
營業時間：11:00am-12:00mn
晚市輪候：約40 分鐘
條件：每次order 必須2 件起（即$4.5 ），無限量供應
米芝肥指數：60kcal
$8 帆立貝壽司
帆立貝即帶子，一般日式餐廳一個order 2 件起碼收25 蚊，羽壽司就最新推出特價，$8 一件而且仲係大過嚿飯成倍嘅jumbo size 。帶子雖然係雪藏貨，但入口又軟又甜，並沒有將貨就價畀cheap 嘢，好此道者，必去！
除帆立貝外，蠔壽司都只係$6 件，另一抵食之選。
羽壽司
地址：旺角花園街18 號華園閣地下4-6 號（3188 5746 ）
營業時間：12:00nn-12:00mn
晚市輪候：約10 分鐘
條件：每次order 2 件起（即$16 ），無限量供應。
米芝肥指數：60kcal
$9 日本珍珠蠔
去蠔吧order 隻日本蠔閒閒哋$30 ，鮮日本料理的最新特價日本珍珠蠔，每天由日本空運到港，日本蠔肉質較爽，入口冇美式蠔咁creamy ，但就鮮味十足。計落order 半打都係$54 ，平過你去city'super 買，惜只得wasabi ，沒有辣茄汁供應。
位於2 樓的鮮門口竟然在SaSa 裏面，要先入SaSa 才可上樓！
鮮日本創作料理
地址：旺角西洋菜街南200 號1 樓（2782 0580 ）
營業時間：11:30am-12:00mn
晚市輪候：10 分鐘
條件：無限量供應
米芝肥指數：蠔28kcal
三文魚104kcal
$28 半磅三文魚刺身
筆者知道喺旺角「菜街」有啲更平嘅$20 半磅三文魚刺身（約12 塊），不過起碼要你最低消費$100 ，仲兩個人以上才可享用，取巧指數甚高。鮮日本創作料理的挪威三文魚價平，但肉質極鮮，上碟時更用冰鎮，賣相與味道同樣吸引。
日賣200 客
訪問當日，老闆阿威話足足切咗6 條魚，約200 客半磅三文魚刺身，「是全店最受歡迎的食品。」
隨海膽有紫菜及飯糰供應
$48 一板海膽
想食豪啲推介你去菊日本料理，以$48 激抵價就可以歎全板（5 ×7 吋）海膽，其他地方吃一板起碼都要$80 ，$48 肯定平絕全城，海膽味道帶甜，口感像蟹膏，入口即溶，一試就知新鮮。而且跟set 仲有白飯紫菜，分量足夠你包10 件海膽壽司。
除海膽外，8 吋長三文魚壽司都係做緊$6 件，抵食。
菊日本料理
地址：尖沙咀山林道4 號恒貿商業大廈地下（2986 3337 ）
營業時間：12:00nn-12:00mn
晚市輪候：約10 分鐘
條件：無限量供應
米芝肥指數：120kcal
