傅穎（Theresa ）早前在《勁歌金曲》中，因冒死獻唱一首全走音的《花吃了這女孩》，慘成烈士，一時間被網友恥笑、被同行唾棄，全城吃了這女孩似的。與其聯署要求Theresa 放棄歌唱事業，倒不如想辦法改善她的唱功，造福人群。記者當仁不讓，特別找來幾位唱家班分享一些歌唱技巧，以矯正Theresa 五音不全之患，實行「save Theresa ，save us 」。 撰文：蘇芬妮
護短杜麗莎（傅穎歌唱老師）「佢人靚聲甜」
「我畀佢嘅表現100分。」誰人比杜麗莎更了解傅穎的唱功？身為Theresa 歌唱老師，《勁歌》當晚以零距離欣賞愛徒獻技，力撐她沒有走音：「佢冇走音，只不過透過電視同YouTube 出嚟有啲唔同，記得佢一個星期前開始搵我學唱歌，佢知道自己要上《勁歌》唱live ，佢同我講好唔想去，知自己水準未夠好，經歷過好多批評，但佢最後都克服咗心理障礙企上台演唱，佢真係好有勇氣。」無可否認，Theresa 勇氣是有的，但唱歌靠的是中氣，杜麗莎仍是唱好她說：「佢有天份㗎，佢把聲好靚，人又甜美，希望大家唔好針對佢，我敢講全香港嘅人包括我唱歌都有機會走音。我見佢事後仲出嚟宣傳，對答仲好大方，真係抵佢咁紅。」
批評吳國敬（資深唱作人）「太注重外表」
吳國敬受訪時多次呼籲大家口下留情，不要狠批Theresa ，無謂令她增添壓力：「唔好用『歌手』身份去睇佢，心知佢唔係唱得之人！」吳國敬認為時下偶像歌手花太多時間搞外表，忽略基本歌藝，遂贈Theresa 一句：「我建議佢搵個好嘅唱歌老師上堂，打好個底，最好係下一、兩年苦功先去做歌手。」
責怪黎小田（資深音樂人）「對首歌唔熟」
Theresa 走音也許是怯場，但忘記歌詞，肯定是準備工夫不足有關，黎小田說：「我覺得佢對首歌唔夠熟，我知家嘅歌手，要兼顧好多唔同類型嘅工作，就算喺錄音室錄歌，好多時會分開一截截錄，咁歌手背歌詞會唔夠熟，佢應該暫時將出書、拍戲或影寫真嘅工作拋開，花幾年去學唱歌。」
訓示區瑞強（民歌王子）「經理人有責」
區瑞強認為歌手應視唱歌為一種工作，敬業樂業：「我覺得Theresa 主要係音唔夠準，基本功打得唔穩。歌手個底好緊要，其實今日咁嘅情況，唱片公司同經理人都要負上責任，歌手唱好歌都係佢哋工作嘅一部份，所以歌手係應該每星期都抽固定時間去練習呼吸同唱歌。每次演出前，最好可以到現場試過音響同綵排。」
建議李紫昕（兒歌天后）「冲凉都唱歌」
李紫昕認為歌手要曲不離口，她說：「無論冲凉又好，拉筋做運動都好，最好成日唱住自己首歌，咁包保可以記得歌詞，同埋唱起上嚟都會投入啲。」她亦留意到Theresa 經常唔夠氣和欠缺自信，但認為「仲有得掹」：「唱歌最緊要字正腔圓，我留意到Theresa 唱歌時，個口唔夠開，可能係玉女，怕擘大個口出鏡唔靚。」
--史上走音四強--傅穎《花吃了這女孩》
Theresa 在《勁歌》獻唱《花吃了這女孩》，以全走音姿態令港人語塞，慘被譏為「屎」上最強歌手，有網友甚至戲言她根本沒有走音，因為沒有入到一粒音，何來走音云云。傅穎《花吃了這女孩》 點擊率：6萬http://www.youtube.com/watch?v=ORLoP7YK5oo
鄧麗欣《電燈膽》
《勁歌金曲》可說是走音歌手的浩園，鄧麗欣的歌唱生涯險些命喪於此，07年獻唱《電燈膽》時將「能迴避嘛我怕了當那電燈膽」的「燈」字唱高八度，「鄧走音」也成了其代名詞。鄧走音《杏加橙》 點擊率：20萬http://www.youtube.com/watch?v=h4bG9-KMi34
伍衞國《超級靚聲演鬥廳》
走音最高境界，莫過於說話也走音。「靚聲王」伍衞國06年直播主持《超級靚聲演鬥廳》，natural high 的他高呼「支持靚聲王嘅請坐低」，「低」字嚴重超key ，身後的馬浚偉也忍不住偷笑。伍衞國走音 點擊率：13萬http://www.youtube.com/watch?v=LaeLM-I60FA
黎明《對不起我愛你》
91年為華東水災籌款的黎明，出錢出力出埋醜。當時他得知寶詠琴捐出50萬點唱，立即飛奔現場獻唱《對不起我愛你》，但當唱到「我又怕心難死」時，個key 唔到，後面「立定決心」整句甩晒。黎明走音 點擊率：34萬http://www.youtube.com/watch?v=UfmWgCus9CQ
傅穎早前在《勁歌》演唱時五音不全，不少音樂人均願意教她改善唱功。
傅穎走音後上電台節目受訪，當時哭個不停。
from
http://appledaily.atnext. ... art_id=12562272
