入行七年的傅穎（Theresa ）最近忽然自爆抑鬱，仲賴自己因為太緊張又話太瘦唔夠氣搞到頻頻失準走音。呢頭講完會改，轉頭又失手。
上星期六（21 日）傅穎出席《勁歌金曲》，現場唱新歌〈花吃了那女孩〉時全程勁走音，搞到唔少網民都睇唔過眼，紛紛上網圍插她是「屎」上最強歌手，而仲瘦過Theresa 的泳兒更暗寸Theresa 賴得就賴，「瘦都可以好夠氣。」傅穎搖身變傅走音，成日俾人話係鄧走音的鄧麗欣睇嚟可以鬆一口氣喇。
鄧走音陰笑：可能佢壓力大啦，我都係過來人。真實對白
Soler 要音準：當然要講經驗，但歌手最緊要音準。真實對白
方皓文潤爆：佢唔太穩定，佢話壓力大？我都壓力好大㗎，咪瞓多啲囉。我就快出碟，等我都試吓病先。真實對白
容祖兒教精：繼續努力，做好本分。真實對白
薛凱琪：瘦都有氣我上次唱live 失準，唔係同瘦有關，係因為我病咗。真實對白
踏入3 月，Theresa 更頻頻發台瘟，最近便爆出本月13 日，Theresa 錄影無綫音樂節目《360 ．音樂無邊》時，已傳她因為走音被導演以粗口大罵，搞到Theresa匿入後台狂喊。走音係事實，但實情Theresa 冇俾監製用粗口鬧，反是她唱極唔掂仲要發爛渣。知情者說：「佢唱〈花吃了那女孩〉第一句就走音，take 咗好多次都唔掂，3 個鐘嘅錄影俾佢拖到近5 粒鐘，錄到第3 次佢仲發脾氣，仲賴係earmon 嘅問題要求更換，不停叫導演畀佢嚟多次，卒之錄咗7 次，最後連導演都怕咗佢，唱live 變播MV 算數。」
畀我嚟多次啦！本月13 日，傅穎與方皓文齊齊為音樂節目《360 ．音樂無邊》錄影時，傅穎第一次rehersal ，唱第一句已走音，嚇到導演和方皓文呆咗。
唔好錄喇，播MV 啦！傅穎唱極唔掂，仲發脾氣話自己唔舒服，又賴earmon 有問題，嚴重影響進度令導演極度不滿，即刻叫停，改播她的MV 算數。
7 年前出道的Cookies ，當時唱功已被彈麻麻，獨立發展後樣就「進步」咗好多，但唱功就似乎退步咗喎！
再度失憶 Theresa 上週六（21 日）在《韓國旅遊美食節》上唱新歌，又忽然失憶忘記歌詞，用「啦啦啦」代替，係時候驗埋個腦喇。
監製：佢唱得唔好
事後Theresa 向記者解釋當晚自己並沒有走音，只是忘記歌詞，但該節目的監製潘裕佳卻踢爆Theresa 當晚係因為唱得差，所以被叫停。不過潘監製仍口下留情說：「佢rehersal 咗兩次，兩次都唱得唔好。（走音？）我唔方便講，總之佢唔係唔記得歌詞啦。佢唱唔到，導演咪惟有叫停佢，播MV 囉。」
上星期六（21 日）Theresa 下午做完「韓國旅遊美食節」大使，晚上則出席無綫《勁歌金曲》，可惜兩場騷又再出事。下晝Theresa 着住韓國傳統服裝演唱〈第一顆流星〉時，唱唱吓突然忘記歌詞，連台下fans 大聲提水亦幫唔到忙，惟有以「啦啦啦」代替，事後她解釋在台上突然腦裏一片空白：「唔知點解近來出席任何活動都好緊張，今日已經叫自己豁出去。」
可嵐唔撐
當晚走音傅穎唱完後，緊接在《勁歌》演出的可嵐被網友大讚是「天籟之音」，她透露綵排時Theresa 已表示好緊張，可嵐更主動幫她祈禱：「冇留意佢唱成點，個個artist 有事我都祈禱㗎啦。」
傅穎連環走音後，唔少網友都在討論區狂插她離譜，有啲更鬧她走音「屎」上最強，但傅穎覺得這是惡意的批評，可以不理。
師傅出馬
老師杜麗莎專程捧Theresa 場，上台前杜麗莎緊擁Theresa ，在耳邊鼓勵：「You can do it!」
台上定驚
同場的古巨基知道Theresa 最近表現唔理想，即場搭膊頭鼓勵。Theresa 稱好多歌手如何韻詩、孫耀威都有send 短訊支持她，不過Stephy 同方力申就冇囉。
台下合十
入廠前Theresa 一直守候在化妝間，唔影相又唔接受訪問，其間雙手合十似祈禱祈求演出順利。
連環甩碌
到當晚現場直播的《勁歌金曲》，就連Theresa 的歌唱老師杜麗莎都因擔心Theresa 唱live ，專程入廠為她打氣，可惜Theresa 唔爭氣，又再走音，唱〈花吃了這女孩〉時幾乎個個字都唔啱key ，由頭走音走到尾。事後唔少網民大插她唱功離譜，仲話「鄧走音」鄧麗欣都唱得好過佢，甚至鬧她係『屎」上最強歌手！」大彈她狡辯博同情。
Theresa 自從日本look 、假大眼轉新形象之後，都好專心鑽研化妝技巧，自問自己化妝都搞得掂。不過出碟又拍寫真、又拍音樂短片、又趕住4 、5 月出兩本書嘅Theresa 邊有時間練唱歌呢？
本週一（23 日），由經理人公司金牌職員傍實的Theresa 回應走音事件時認晒衰：「我有好多不足嘅地方，我會做好啲。」
賴live 露底
唱足七年仍然唔掂，本週一（23 日）Theresa 出席活動時雖然認衰，但又不忘力撐自己係因為唱「live 」唔係咪嘴，先至令佢啲甩碌嘢出晒街。
F ：《FACE 》 T ：Theresa
F ：做咗歌手7 年，最近表現咁差覺得覺得自己唔稱職？
T ：當然好留意最近嘅表現，我係有心結未解開，因為我追求完美……有啲嘢over 咗影響表現。
F ：有網民話你係「屎」上最強歌手喎！
T ：我係有唔好嘅地方，但惡性批評我唔會理會，我會企番起身面對將來。
F ：會唔會少啲唱live ？
T ：咁先證明我嘅live performance is real （現場演出是真實的），唔係咪嘴。咁樣可以鍛煉自己豁出去，放膽唱好啲。
F ：有其他歌手暗寸你……
T：Stephy 唔會咁做，好似Stephy 同可嵐嗰日都喺《勁歌》，可嵐都鼓勵我，仲幫我祈禱添，Paco （經理人黃柏高）都鼓勵我，我唔會令錫我嘅人擔心我。
係囉，睇嚟Theresa 真係唔好掛住染髮同撐大眼搞咁多花臣喇，專心練好啲唱功好過啦！
此地無銀
其實sell 樣似㗎妹，兼身材均勻的傅穎，一向冇乜人對佢唱功有期望。但今個月初開始，佢接二連三自爆話因為太瘦又話情緒影響唱功，全世界先開始留意到原來傅穎唱功真係「屎」上最強！
《蘋果日報》圖片
4/3 賴太瘦
跟方力申出席港台《光輝歲月》時，唔單只賴自己有106 磅係太瘦，所以唔夠氣，之後仲寫blog 話自己肺功能不及格，謝安琪爆過肺都唱得唔差喎，Theresa 似乎夾硬咗啲。
14/3 「走」到澳門
傅穎於澳門演出《金牌大風'09 演唱會》期間，大會要求記者到後台訪問Stephy，令記者看不到傅穎的演出。但當晚傅穎又漏夜寫blog 話自己當晚有太大失誤。原本冇人知佢走音都變咗通晒天。
《蘋果日報》圖片
94 磅泳兒夠氣
比傅穎更瘦的泳兒話肥瘦跟夠唔夠氣唔關事。「瘦都可以好夠氣，除非佢瘦到好似洪卓立咁開完刀做完手術就有影響……不過人人體質唔同，傅穎方面我唔評論喇！」
Joyce ：「總之佢好靚、好nice ，走音都冇所謂㗎。」
苑仔：「佢對fans 好好，寄信畀佢都有覆番我，唔覺佢走音，跳舞好睇呀。」
