金融海嘯都要唞吓氣，復活節可慳慳哋去離島玩。早前老友次文化堂老細彭志銘去南丫島做嘢，我跟埋去。呢位聲大大但好細心嘅麻甩佬話，香港由218個島嶼組成，小島故事即係香港故事，咁多年有16個島因填海等冇咗。南丫島係少數算有多啲後生仔住嘅，四分一係外國人，好有異國風情。
巴基斯坦、中國混血兒簡生，喺南丫島賣人手製鳳凰卷，賣到出晒名。
阿彭話，買鳳凰卷唔使去澳門，可以去南丫島。巴基斯坦、中國混血兒簡生，在港出生後跑到國外住，最後返嚟南丫島榕樹灣開「金卷食品」，人手製鳳凰卷皮厚薄不一，比機製更有層次感，蛋漿更重手，一包約20蚊平過澳門，另「獨門秘製」炸白飯魚，30蚊一大包，唔少人特登入嚟買。外來人Shelly 十年前放棄市區文職，一個女仔跑嚟做全職「南丫人」開自家製蛋糕店，家Shelly Cake 已成為當地「品牌」。阿彭話，佢主持港台《香港故事》嘅《島人•情味》，發現好多有趣人與事，大家想感受「一人有一個小島故事」，今晚起逢星期日晚上7:30喺亞視本港台睇，或者上http://tv.rthk.org.hk 睇直播及重溫。最近又有個促進離島區旅遊嘅活動「離島──哩度遊」，大家可以上網睇睇http://www.islandhk.org 。電郵：mailto:shoppingjing@appledaily.com
姓名：Shopping 精性別：女年齡：年年24歲興趣：行街買嘢、吃喝玩樂、做高溫瑜伽
from
http://appledaily.atnext. ... art_id=12523315
