唔急唔急，實有機會嘅！（設計對白）唔只一次開到口想返無線拍劇嘅劉錫明，拍台劇即使要扮老豆，但佢話角色有得發揮，又多內心戲，所以唔介意。
多得倪震偷食，令消失香港娛樂圈十七年嘅劉錫明，有機會為「毒瘤」事件平反，甚至有傳佢可以返「娘家」無線拍劇。
禮拜日（三月十六日），劉錫明現身台灣，出席同何潤東、大S 徐熙媛、林嘉綺、黃曉明等一齊合作嘅偶像劇《泡沬之夏》記者會。
差不多七年無拍台灣劇，劉錫明話因為同身兼演員、製作人嘅何潤東簽埋同一間唱片公司，大家自己友，所以有份拍，不過佢就要做何潤東老豆。
何潤東（左一）、大S ，以及一直想去台灣發展嘅黃曉明，劇中發展三角戀。導演預告，大S 同黃曉明會有多場激烈接吻戲。
新劇集合中、港、台三地演員，仲有多位靚女助陣，堅持打針美白嘅大S ，要面對兩位膚色比佢深，又高佢成個頭嘅蔣怡（左）以及林嘉綺（右），搶鏡唔容易。
現場其他主要演員都係青春偶像，完全唔啱傾嘅劉錫明，唯有黐實同劇演員、張震爸爸張國柱一齊坐。
今年44 歲嘅劉錫明點睇都唔似生得出33 歲兼六呎高嘅何潤東，所以當正式開劇，劉錫明要化老妝出鏡。
唔介意做老豆，劉錫明喺記者會更開晒口話希望拍完台劇之後，下一部劇可以返無線，隔岸賣口乖。其實劉錫明嚟緊都有好多job ，除咗推出全新大碟，仲會首次做製作人，集資千五萬開拍一套三十集民初劇。外面大把世界，返無線，只係情意結啫！
