唐詩詠同崔建邦拍拖已經係公開嘅秘密，不過佢哋成日鬧交，搞到多次分手又復合，之前仲傳出崔建邦狂追啱啱失戀嘅徐淑敏（Suki ）o忝，總之三個人嘅關係糾纏不清。前晚唐詩詠同徐淑敏一齊到將軍澳電視廣播城，錄影無綫節目《掌故王》，情敵當前，佢哋又俾記者拉住影合照，令徐淑敏大嗌尷尬，唐詩詠就大方啲，仲強調早知道係流料。
許紹雄、徐淑敏、唐詩詠同馬浚偉前晚齊齊錄影夏雨主持嘅《掌故王》。
崔建邦同唐詩詠早前傳分手，最近又話佢哋復合。資料圖片
見崔建邦尷尬
Suki 事後接受訪問時承認好尷尬，佢話：「我同唐詩詠見面係有少少尷尬，影相都有尷尬，其實我之前見到崔建邦都一樣覺得好尷尬，因為想同佢打招呼，不過又唔知打唔打好。」另一邊廂嘅唐詩詠丁母憂，心情已回復過嚟，佢都希望可以盡快開工，佢話：「5月我會接拍一個古裝劇，仲要學定打功夫。」問唐詩詠同Suki 見面有冇尷尬？佢笑笑口話：「我冇嘢喎，唔尷尬呀，呢啲傳聞唔好咁介懷，因為我知係流料。」唐詩詠就梗係知乜嘢料啦，因為最近又傳番佢同崔建邦復合，佢實要撐男友o架。
崔建邦兩大緋聞女友徐淑敏（左）同唐詩詠影合照，徐淑敏話好尷尬，惟有以笑遮醜。
http://appledaily.atnext. ... art_id=12495749
