上海直擊林志玲前日先喺香港為佢喺《赤壁》中飾演嘅小喬蠟像出席揭幕禮，但噚日佢已經飛到上海出席浪琴錶續約儀式，並由品牌大中華區優雅大使升級成為全球優雅大使，另一位已代言6年嘅劉嘉玲就已經喺今個月約滿。據知林志玲今次續約3年，酬勞係反海嘯，竟由本來一年約112萬加至每年約224萬，升幅一倍，難怪有傳林志玲胞兄經營彩妝生意虧蝕500萬，荷包腫脹嘅林志玲都可以從容咁話：「不用擔心，一切都很好。」
早有前科
林志玲噚日現身上海出席手錶活動時表演跳舞，台下掌聲如雷。
噚日身穿低V 性感晚裝嘅林志玲喺父親同阿哥陪同下到場，佢仲表演跳舞，令人目不暇給，點知活動完畢接受內地傳媒訪問時，林志玲忽然變形，心口遍佈顯眼紅斑，當堂大殺風景，在場記者都為佢擔心，唔知佢係過敏定有其他問題。其實林志玲身體出現紅斑唔係第一次，佢曾經向台灣記者自爆天生體質過敏，只要光線過熱或者灰塵過多，塊面同個身都會即刻變紅。前年林志玲出席上海嫣然基金晚會嗰陣，就試過塊面紅到似白灼蝦嘅奇景，當時佢解釋係空肚飲酒累事；之前林志玲去北京惡補演技準備開拍《赤壁》，又因為北京沙塵勁而皮膚過敏，搞到呢位傾國傾城嘅小喬差啲變成大花臉。不過志玲就話皮膚天生係咁，冇考慮特別睇醫生，只係提醒自己要留意多啲。
完成活動後嘅林志玲突然皮膚過敏，心口出現顯眼紅斑，當堂大殺風景。
http://appledaily.atnext. ... art_id=12490769
